రా అండ్ రస్టిక్‌గా అనకాపల్లి టీజర్.. సమ్మర్‌లో చిత్రం విడుదల

భవ్య శ్రీ మూవీ మేకర్స్ మరియు నక్కిన నెరేటివ్స్ బ్యానర్ల పై కండ్రేగుల నాయుడు, త్రినాథరావు నక్కిన నిర్మిస్తున్న తాజా చిత్రం అనకాపల్లి. ఈ సినిమాకు ఖగేష్ తమ్మినేని దర్శకత్వం వహిస్తున్నారు. కండ్రేగుల కుమార్ రాజా సహ నిర్మాతగా వ్యవహరిస్తున్నారు. ఈ మూవీలో విక్రమ్ సహిదేవ్, సంధ్య వశిష్ట ప్రధాన పాత్రల్లో నటిస్తున్నారు. ఈ చిత్రానికి కథ, స్క్రీన్ ప్లే అందించిన త్రినాథరావు నక్కిన, సినిమాలో ఒక కీలక పాత్రలో కూడా కనిపించనున్నారు. తాజాగా విడుదలైన టీజర్ ప్రేక్షకుల్లో ఆసక్తిని పెంచుతోంది.

మనకు కావాల్సింది దక్కాలంటే ఎదుటివాడికి మన మీద భయం ఉండాలి అనే పవర్‌ఫుల్ డైలాగ్‌తో ప్రారంభమైన టీజర్‌లో యాక్షన్, భావోద్వేగాలు, ప్రేమ అన్ని మేళవింపుగా చూపించారు. మాస్ ప్రేక్షకులకు నచ్చే యాక్షన్ సన్నివేశాలు, యువతకు దగ్గరయ్యే ప్రేమ కథ, కుటుంబ ప్రేక్షకులను ఆకట్టుకునే ఎమోషనల్ అంశాలు అన్ని ఇందులో కనిపిస్తున్నాయి. టీజర్‌లో విజువల్స్, బ్యాక్‌గ్రౌండ్ మ్యూజిక్, యాక్షన్ సన్నివేశాలు రా అండ్ రస్టిక్ స్టైల్‌లో ఉండటం ప్రత్యేక ఆకర్షణగా నిలిచింది. కథలో కొత్తదనం ఉంటుందనే సంకేతాలు కూడా కనిపిస్తున్నాయి.

ఈ చిత్రానికి మాయా.వి సినిమాటోగ్రఫీ అందించగా, దేవ్ జండ్ సంగీతాన్ని అందించారు. శ్రీకృష్ణ అట్టలూరి ఎడిటింగ్ బాధ్యతలు నిర్వహించారు. డైలాగ్స్‌ను ఉదయ్ భాగవతులు రాశారు. ఈ సినిమా సమ్మర్‌లో విడుదలకు సిద్ధమవుతోంది.