రూ.15 వేల జీతం తీసుకునే ఉద్యోగి పేరుతో రూ.350 కోట్ల లావాదేవీలు..

కర్ణాటకలోని బళ్లారిలో భారీ ఆర్థిక మోసం వెలుగులోకి వచ్చింది. ఓ సాధారణ ఉద్యోగి గుర్తింపు పత్రాలను దుర్వినియోగం చేసి, అతడి పేరుతో ఏకంగా రూ.350 కోట్ల వ్యాపార లావాదేవీలు నిర్వహించినట్లు ఆరోపణలు రావడం కలకలం రేపింది. బళ్లారికి చెందిన రోషన్‌ జమీల్‌ స్థానిక కార్ల షోరూమ్‌లో పనిచేస్తూ నెలకు రూ.15 వేల జీతం తీసుకుంటున్నాడు. అతడి తండ్రి ఓ గోదాములో కూలీగా పనిచేస్తున్నారు. ఈ నేపథ్యంలో రోషన్‌ ఆధార్‌, పాన్‌, బ్యాంకు ఖాతా వివరాలు, విద్యుత్‌ బిల్లు వంటి వ్యక్తిగత పత్రాలను కొందరు దుండగులు దుర్వినియోగం చేసినట్లు ఆరోపణలు ఉన్నాయి. నకిలీ పత్రాలతో ‘రోషన్‌ ఎంటర్‌ప్రైజెస్‌’ పేరుతో ప్లాస్టిక్‌ వ్యాపార సంస్థను ఏర్పాటు చేసి, గతేడాది మే నుంచి అక్టోబర్‌ వరకు సుమారు రూ.350 కోట్ల లావాదేవీలు నిర్వహించినట్లు సమాచారం.

ఇటీవల ఆ సంస్థకు సంబంధించిన బ్యాంకు ఖాతా మూసివేయడంతో జీఎస్టీ అధికారులు అప్రమత్తమయ్యారు. నోటీసులు అందించేందుకు రోషన్‌ ఇంటికి వెళ్లి విచారించడంతో ఈ వ్యవహారం వెలుగులోకి వచ్చింది. దీంతో ఆందోళనకు గురైన రోషన్‌.. లావాదేవీల వివరాలు తెలుసుకునేందుకు జీఎస్టీ అధికారులను సంప్రదించినప్పటికీ సరైన స్పందన రాలేదని తెలిపాడు. అనంతరం తల్లిదండ్రులతో కలిసి సైబర్‌ క్రైమ్‌ పోలీసులకు ఫిర్యాదు చేశాడు. ఈ వ్యాపార లావాదేవీల గురించి తనకు ఎలాంటి సమాచారం లేదని, సంస్థకు అనుసంధానించిన మొబైల్‌ నంబర్‌, ఈ-మెయిల్‌ కూడా తనవి కావని స్పష్టం చేశాడు. తన వ్యక్తిగత గుర్తింపు పత్రాలను దుర్వినియోగం చేసి భారీ మోసానికి పాల్పడ్డారని ఆరోపిస్తూ, బాధ్యులపై చర్యలు తీసుకోవాలని కోరాడు. ఈ ఘటనపై బళ్లారి పోలీసులు దర్యాప్తు ప్రారంభించి ఆధారాలు సేకరిస్తున్నట్లు సమాచారం.