ఆస్కార్ అవార్డుల వెనుక ఆసక్తికర చరిత్ర, అరుదైన విశేషాలు!

ప్రపంచ సినీ రంగంలో అత్యున్నత గౌరవంగా భావించే అవార్డు ఆస్కార్. వెండితెర నటీనటుల చిరకాల స్వప్నంగా నిలిచిన ఈ అవార్డుకు అసలు పేరు ‘అకాడమీ అవార్డ్ ఆఫ్ మెరిట్’. అకాడమీ లైబ్రేరియన్ మార్గరెట్ హెరిక్ ఈ విగ్రహాన్ని చూసి అది తన బాబాయ్ ఆస్కార్‌లా ఉందని సరదాగా చెప్పడంతో ఆ పేరు ప్రపంచవ్యాప్తంగా ప్రాచుర్యం పొందింది. మెరిసే బంగారు విగ్రహంలా కనిపించే ఈ ట్రోఫీ సుమారు 3.8 కిలోల బరువు, 13.5 అంగుళాల పొడవు కలిగి ఉంటుంది.
ఆస్కార్ ట్రోఫీని అమ్మడంపై కఠినమైన నిబంధనలు ఉన్నాయి. 1951 నిబంధన ప్రకారం విజేతలు లేదా వారి వారసులు ఆ అవార్డును వదులుకోవాలనుకుంటే ముందుగా అకాడమీకే తిరిగి ఇవ్వాలి, దానికి ప్రతిగా అకాడమీ కేవలం ఒక్క డాలర్ మాత్రమే చెల్లిస్తుంది. ప్రతి సంవత్సరం జరిగే ఈ అట్టహాసమైన కార్యక్రమం నిర్వహణకు సుమారు రూ.500 కోట్ల వరకు ఖర్చవుతుందని అంచనా. 2002 నుంచి లాస్ ఏంజెలెస్‌లోని డాల్బీ థియేటర్ ఆస్కార్ వేడుకలకు శాశ్వత వేదికగా మారి అనేక చారిత్రక క్షణాలకు సాక్ష్యంగా నిలిచింది.