‘పుష్ప’ పాత్రపై సునీల్ ఆసక్తికర వ్యాఖ్యలు

కమెడియన్‌గా కెరీర్ ప్రారంభించి హీరోగా, విలన్‌గా ప్రత్యేక గుర్తింపు సంపాదించిన నటుడు సునీల్, ‘పుష్ప’ సినిమాలో మంగళం శ్రీను పాత్ర తన జీవితాన్ని మార్చేసిందని తెలిపారు. తన తాజా మలయాళ చిత్రం ‘కాటాలన్’ తెలుగు వెర్షన్ ప్రచార కార్యక్రమంలో పాల్గొన్న ఆయన, ఆ పాత్రకు ఎంపిక కావడం తనకూ ఆశ్చర్యమేనని చెప్పారు. అన్ని భాషల్లోనూ అవకాశాలు రావడానికి ‘పుష్ప’లోని పాత్రే ప్రధాన కారణమని వెల్లడించారు.

సుకుమార్ తనకు ఫోన్ చేసి పూర్తిస్థాయి విలన్ పాత్ర ఉందని, ఎలాంటి హావభావాలతో నటించాలో ప్రత్యేకంగా చెప్పారని సునీల్ గుర్తుచేసుకున్నారు. లుక్ పరీక్ష కోసం పంపిన చిత్రాలు నచ్చడంతో ఆ పాత్రకు ఎంపికయ్యానని తెలిపారు. పాత్ర కోసం చిత్రీకరణ మొత్తం నుదుటిపై జుట్టు తీసేయాల్సి వచ్చిందని చెప్పారు. ఏనుగు దంతాల అక్రమ రవాణా నేపథ్యంలో తెరకెక్కిన ‘కాటాలన్’ చిత్రం ఈరోజు తెలుగులో విడుదలైంది.