శర్వానంద్ సినిమాకు షాకింగ్ టీఆర్‌పీ!

నారీ నారీ నడుమ మురారి థియేటర్లలో మంచి విజయాన్ని అందుకున్నప్పటికీ బుల్లితెరపై మాత్రం ఆశించిన స్థాయిలో ఆకట్టుకోలేకపోయింది. శర్వానంద్ హీరోగా నటించిన ఈ చిత్రం సంక్రాంతి సీజన్‌లో ఫ్యామిలీ ఆడియెన్స్‌ను బాగా ఆకట్టుకుంది. అయితే తాజాగా ఈటీవీలో వరల్డ్ టెలివిజన్ ప్రీమియర్‌గా ప్రసారమైన ఈ సినిమాకు కేవలం 1.59 టీఆర్‌పీ మాత్రమే రావడం సినీ వర్గాలను ఆశ్చర్యానికి గురిచేసింది. థియేటర్లలో మంచి ఆదరణ పొందిన సినిమా టీవీ ప్రేక్షకులను ఎందుకు ఆకట్టుకోలేకపోయిందనే చర్చ ఇప్పుడు సోషల్ మీడియాలో హాట్ టాపిక్‌గా మారింది.

రామ్ అబ్బరాజు దర్శకత్వంలో తెరకెక్కిన ఈ చిత్రంలో సంయుక్త మీనన్, సాక్షి వైద్య కీలక పాత్రలు పోషించారు. కామెడీ, ఫ్యామిలీ ఎమోషన్స్‌తో రూపొందిన ఈ చిత్రం థియేటర్లలో మంచి కలెక్షన్లు సాధించింది. అయితే ఐపీఎల్ సీజన్, ఓటీటీ ప్లాట్‌ఫార్మ్‌ల ప్రభావం, యువత టీవీకి దూరమవడం వంటి అంశాలు టీఆర్‌పీలపై ప్రభావం చూపుతున్నాయని విశ్లేషకులు చెబుతున్నారు. విశాల్ చంద్రశేఖర్ సంగీతం అందించిన ఈ చిత్రాన్ని అనిల్ సుంకర, రామబ్రహ్మం సుంకర నిర్మించారు. శర్వానంద్ కెరీర్‌లో మంచి ఫ్యామిలీ ఎంటర్టైనర్‌గా నిలిచిన ఈ చిత్రం టీవీలో మాత్రం నిరాశపరిచే రేటింగ్ సాధించడం అభిమానులను షాక్‌కు గురిచేసింది.