పుష్ప సినిమాలో ఆ పాత్ర నేను చేయాల్సింది: శివాజీ...

టాలీవుడ్ నటుడు శివాజీ ‘తెల్ల కాగితం’ సినిమా ప్రచార కార్యక్రమంలో పాల్గొని ‘పుష్ప’ సినిమాకు సంబంధించి ఆసక్తికర విషయాన్ని వెల్లడించారు. అల్లు అర్జున్‌, సుకుమార్‌ కాంబినేషన్‌లో తెరకెక్కిన ఈ చిత్రంలోని ‘మంగళం శ్రీను’ పాత్రకు మొదట సుకుమార్ తనను అనుకున్నారని శివాజీ తెలిపారు. అయితే ఆ పాత్ర చివరకు సునీల్‌కు దక్కిందని, ఆయన ఆ పాత్రలో అద్భుతంగా నటించి జీవం పోశారని ప్రశంసించారు. ఒక పాత్ర ఎవరికి రాసి ఉంటే చివరకు వారికే సరిపోతుందని శివాజీ వ్యాఖ్యానించారు.

‘తెల్ల కాగితం’ గురించి మాట్లాడుతూ.. సినిమాల్లోకి రీఎంట్రీ ఇవ్వాలని భావించిన సమయంలో తాను విన్న రెండో కథ ఇదేనని, కథ నచ్చడంతో తొలుత తానే ఈ చిత్రాన్ని నిర్మించాలని అనుకున్నట్లు చెప్పారు. అయితే ఈ సినిమా పలువురు నిర్మాతల చేతులు మారి చివరకు దిల్‌ రాజు, కృష్ణ కొమ్మలపాటి సంయుక్త నిర్మాణంలో తెరకెక్కి తన వద్దకు నటుడిగా రావడం సంతోషంగా ఉందన్నారు. రమేశ్‌ బండ్రెడ్డి దర్శకత్వం వహిస్తున్న ‘తెల్ల కాగితం’తో పాటు గ్రాఫిక్స్‌కు ప్రాధాన్యత ఉన్న ‘కూర్మావతారం’ చిత్రంలోనూ తాను నటిస్తున్నట్లు శివాజీ వెల్లడించారు.