సీక్రెట్‌గా పెళ్లి చేసుకున్న హీరోయిన్ ప్రియా భవానీ శంకర్

దక్షిణాది సినీ పరిశ్రమలో పెళ్లిళ్ల సందడి కొనసాగుతోంది. పలువురు సినీ ప్రముఖులు నిశ్చితార్థాలు, వివాహాలతో అభిమానులకు సర్‌ప్రైజ్ ఇస్తున్నారు. తాజాగా నటి ప్రియా భవానీ శంకర్ తన ప్రియుడు రాజ్ వేల్‌ను వివాహం చేసుకుని అందరినీ ఆశ్చర్యపరిచారు. ఎలాంటి ఆర్భాటాలు లేకుండా కుటుంబ సభ్యులు, అత్యంత సన్నిహితులు, కొద్దిమంది స్నేహితుల సమక్షంలో చెన్నైలో నవంబర్ 11 ఉదయం వీరి వివాహ వేడుక నిరాడంబరంగా జరిగింది. కాలేజీ రోజుల నుంచి మొదలైన వీరి పరిచయం ప్రేమగా మారి, పదేళ్లకు పైగా సాగిన ప్రయాణం పెళ్లితో కొత్త మలుపు తిరిగింది. తమ ప్రేమ బంధం గురించి ప్రియా గతంలోనే వెల్లడించారు. అంతేకాకుండా కొన్నేళ్ల క్రితమే చెన్నై బీచ్ సమీపంలో ఇద్దరూ కలిసి ఓ ఇంటిని కొనుగోలు చేసినట్లు వార్తలు వచ్చాయి.

న్యూస్ యాంకర్‌గా కెరీర్ ప్రారంభించిన ప్రియా భవానీ శంకర్ నటిగా మంచి గుర్తింపు సంపాదించారు. తమిళంలో పలు విజయవంతమైన చిత్రాల్లో నటించడంతో పాటు తెలుగులో 'కళ్యాణం కమనీయం', 'భీమా', 'జీబ్రా' సినిమాలతో ప్రేక్షకులకు దగ్గరయ్యారు. ఇటీవల 'ఇరుముడి' చిత్రంతోనూ గుర్తింపు తెచ్చుకున్నారు. మరోవైపు సాయిధరమ్ తేజ్ నిశ్చితార్థం, తేజ సజ్జా వివాహానికి సంబంధించిన వార్తలు, అనిరుధ్-కావ్య మారన్ వివాహ వార్తలతో దక్షిణాది సినీ పరిశ్రమలో పెళ్లి సందడి నెలకొంది. ఈ క్రమంలో ప్రియా భవానీ శంకర్ వివాహ వార్త అభిమానుల్లో ఆనందాన్ని నింపింది. ఈ కొత్త జంటకు పలువురు శుభాకాంక్షలు తెలుపుతున్నారు.