పాటకు ప్రాణం పోసిన కవి.. ప్రసూన్ జోషి సృజనాత్మక ప్రస్థానం

ప్రసూన్ జోషి పాటల్లో పదాలు కేవలం అలంకారాలుగా కనిపించవు. ప్రేమ, అనుబంధం, నిరీక్షణ, విరహం, జీవితం వంటి అనుభవాలను ఆయన తన రచనల్లో ఎంతో సున్నితంగా ఆవిష్కరిస్తారు. వ్యక్తి నుంచి సమాజం వరకు, దేశం నుంచి కలల వరకు ఏ అంశం ఆయన కవిత్వంలోకి వచ్చినా, అది మనిషి అనుభవాలతో ముడిపడిన మానవీయ స్వరంగా మారుతుంది. అందుకే ఆయన రాసిన అనేక పాటలు ప్రేక్షకుల మనసుల్లో చిరస్థాయిగా నిలిచాయి.

1971 సెప్టెంబర్ 16న ఉత్తరాఖండ్‌లోని అల్మోరాలో జన్మించిన ప్రసూన్ జోషి చిన్నతనం నుంచే సాహిత్య, సాంస్కృతిక వాతావరణంలో పెరిగారు. 17 ఏళ్ల వయసులోనే తన తొలి పుస్తకాన్ని ప్రచురించిన ఆయన, అనంతరం ఢిల్లీలో ప్రకటనల రంగంలో అడుగుపెట్టారు. పలు ప్రముఖ అంతర్జాతీయ బ్రాండ్లకు పనిచేసిన ఆయన ‘థండా మత్లబ్ కోకా-కోలా’ ప్రచారంతో ప్రత్యేక గుర్తింపు పొందారు. 2001లో లజ్జా చిత్రంతో సినీ గీత రచయితగా ప్రయాణం ప్రారంభించి, హమ్ తుమ్, రంగ్ దే బసంతీ, తారే జమీన్ పర్, గజిని, దిల్లీ-6, భాగ్ మిల్కా భాగ్ వంటి చిత్రాలకు గుర్తుండిపోయే పాటలు అందించారు. తారే జమీన్ పర్, చిట్టగాంగ్ చిత్రాల పాటలకు జాతీయ చలనచిత్ర పురస్కారాలు అందుకున్న ఆయనను 2015లో భారత ప్రభుత్వం పద్మశ్రీతో సత్కరించింది. ఆధునికతను స్వీకరిస్తూనే కవిత్వం, సరళత, లోతైన భావాన్ని తన రచనల్లో నిలబెట్టుకోవడం ప్రసూన్ జోషి ప్రత్యేకతగా నిలిచింది.