డిసెంబర్‌లోగా నంది అవార్డుల ప్రదానం.. అవార్డులపై ప్రభుత్వం కీలక ప్రకటన!

నంది ఫిల్మ్, టీవీ అవార్డుల పునరుద్ధరణకు సంబంధించి ఆంధ్రప్రదేశ్ ప్రభుత్వం కీలక నిర్ణయాలు తీసుకుంది. ఎఫ్‌డీసీ చైర్మన్ పి. భరత్ భూషణ్ వెల్లడించిన వివరాల ప్రకారం 2012 నుంచి 2016 వరకు గతంలో ప్రకటించిన నంది ఫిల్మ్, టీవీ అవార్డులను అందించనున్నారు. 2017 నుంచి 2024 వరకు ప్రతి ఏడాదికి నాలుగు అవార్డుల చొప్పున, రెండు ప్రొడక్షన్, రెండు స్పెషల్ జ్యూరీ అవార్డులు ఇవ్వనున్నారు. 2025 సంవత్సరానికి సంబంధించిన నంది ఫిల్మ్, టీవీ అవార్డులను కూడా అందించేందుకు ప్రభుత్వం నిర్ణయించింది. నంది ఫిల్మ్, జాతీయ చలనచిత్ర అవార్డుల వేడుకలను అమరావతి లేదా విజయవాడలో, నంది టీవీ అవార్డుల వేడుకను తిరుపతిలో నిర్వహించనున్నారు.

అన్ని అవార్డులను డిసెంబర్ 2026లోగా ప్రదానం చేయాలని ప్రభుత్వం లక్ష్యంగా పెట్టుకుంది. అక్టోబర్‌లో నంది ఫిల్మ్, టీవీ అవార్డుల ఎంపిక కమిటీలను ఏర్పాటు చేసి, నవంబర్‌లో ఎంపిక ప్రక్రియ నిర్వహించనున్నారు. డిసెంబర్‌లో అవార్డుల ప్రదానోత్సవాలు జరగనున్నాయి. ఫిల్మ్ విభాగంలో 46 అవార్డులు, టీవీ విభాగంలో 48 అవార్డులు అందించనున్నారు. ఉత్తమ చిత్రం, నటుడు, నటి, సహాయ నటుడు, సహాయ నటి, దర్శకుడు, స్క్రీన్‌ప్లే రచయిత తదితర విభాగాల్లో అవార్డులు ఇవ్వనున్నారు. గ్రహీతలకు నంది పురస్కారాలతో పాటు ప్రశంసాపత్రాలు, నగదు పారితోషికాలు అందించనున్నారు.