పెళ్లి తర్వాత మహిళలకే ఎందుకు నిబంధనలు - నమిత

ప్రముఖ నటి నమిత ఒకప్పుడు దక్షిణాది చిత్ర పరిశ్రమలో గ్లామర్‌ క్వీన్‌గా గుర్తింపు తెచ్చుకున్నారు. ‘సింహా’, ‘బిల్లా’, ‘సొంతం’, ‘అళగియ తమిళ్‌ మగన్‌’ వంటి విజయవంతమైన చిత్రాల్లో నటించి తనకంటూ ప్రత్యేక గుర్తింపు సంపాదించారు. వివాహం తర్వాత సినిమాలకు కొంత దూరంగా ఉన్నప్పటికీ సామాజిక మాధ్యమాల ద్వారా అభిమానులతో ఎప్పటికప్పుడు టచ్‌లో ఉంటున్నారు. తాజాగా ఓ ఇంటర్వ్యూలో వివాహ వ్యవస్థ, మహిళలపై సమాజం విధించే ఆచారాలపై నమిత చేసిన వ్యాఖ్యలు చర్చనీయాంశంగా మారాయి.

పెళ్లి తర్వాత తాళి, బొట్టు వంటి సంప్రదాయాలను మహిళలే ఎందుకు పాటించాలని ఆమె ప్రశ్నించారు. భర్త క్షేమం కోసం భార్యలు ఉపవాసాలు, పూజలు చేస్తుంటే.. భార్య ఆరోగ్యం, దీర్ఘాయుష్షు కోసం భర్తలు కూడా ఇలాంటి ఆచారాలు పాటించే నియమం ఎందుకు లేదని నిలదీశారు. మహిళలపై రుద్దుతున్న అనేక ఆచారాలను భగవంతుడు సృష్టించలేదని, సమాజమే తన సౌకర్యం కోసం రూపొందించిందని ఆమె అభిప్రాయపడ్డారు. నమిత వ్యాఖ్యలకు కొందరు మద్దతు తెలుపుతుండగా, మరికొందరు సంప్రదాయాలను విమర్శించడంపై అభ్యంతరం వ్యక్తం చేస్తున్నారు.