‘మాస్’ ఫెయిల్… ‘ఫ్యామిలీ’దే భరోసా – రవితేజ కొత్త దారి

టాలీవుడ్‌లో ఎలాంటి బ్యాక్‌గ్రౌండ్ లేకుండా స్టార్ హీరోగా ఎదిగిన మాస్ మహారాజా రవితేజ ఇప్పుడు తన కెరీర్‌లో కఠిన దశను ఎదుర్కొంటున్నారు. ఇడియట్, అమ్మ నాన్న ఓ తమిళ అమ్మాయి, విక్రమార్కుడు, కిక్ వంటి బ్లాక్‌బస్టర్లతో ఒకప్పుడు సత్తా చాటిన రవితేజ, గత దశాబ్దంలో మాత్రం వరుస ఫ్లాప్‌లను ఎదుర్కొంటున్నారు. రాజా ది గ్రేట్, క్రాక్, ధమాకా మినహా మిగతా సినిమాలన్నీ నిరాశపరిచాయి. తాజాగా విడుదలైన మాస్ జాతర కూడా పెద్ద ఆశలు నెరవేర్చలేకపోయింది. వీకెండ్‌కే దారుణ ఫలితాన్ని చవిచూసిన ఈ చిత్రం సోమవారం నుంచే పూర్తిగా కూలిపోయింది.

ఈగల్ వంటి కొత్త కాన్సెప్ట్ సినిమాలు చేసినా ఫలితం రాలేదు, మళ్లీ మాస్ ట్రాక్‌లోకి వెళ్లినా కూడా విజయాలు దక్కడం లేదు. ఈ పరిస్థితిలో రవితేజ దృష్టి ఇప్పుడు ఫ్యామిలీ ఎంటర్టైనర్ వైపు మళ్లింది. నేను శైలజ, చిత్రలహరి లాంటి భావోద్వేగ సినిమాలతో గుర్తింపు తెచ్చుకున్న కిషోర్ తిరుమల దర్శకత్వంలో రవితేజ చేస్తున్న కొత్త సినిమా పేరు భర్త మహాశయులకు విజ్ఞప్తి అని వినిపిస్తోంది. ఇది రవితేజ ఇమేజ్‌కు భిన్నంగా, సాఫ్ట్ ఫ్యామిలీ డ్రామా కానుంది.

ఆడవాళ్లు మీకు జోహార్లు తర్వాత విరామం తీసుకున్న కిషోర్ తిరుమల ఈసారి చాలా జాగ్రత్తగా సినిమా చేస్తున్నాడని టాక్. రవితేజకూ, కిషోర్‌కీ హిట్ చాలా అవసరమైన టైమ్ ఇది కాబట్టి, ఈ కాంబినేషన్‌పై అభిమానుల అంచనాలు భారీగా ఉన్నాయి.

ఈ చిత్రాన్ని మొదట సంక్రాంతికి రిలీజ్ చేయాలనుకున్నారు కానీ, అది కాస్త ఆలస్యమయ్యే అవకాశం ఉంది. ఫిబ్రవరి లేదా మార్చిలో విడుదల అయ్యే ఛాన్స్ ఉంది. ఎప్పుడు వచ్చినా, ఈ సినిమా రవితేజకు హిట్ కావడం తప్పనిసరి — లేకపోతే ఆయన మార్కెట్ మరింత క్షీణించే అవకాశం ఉంది.