డైరెక్షన్ చేస్తున్న, స్క్రిప్ట్ రెడీ చేస్తున్న ... హీరోయిన్ కీర్తి సురేష్

హీరోయిన్ల కెరీర్‌ పెళ్లి తర్వాత నెమ్మదించిపోతుందనే మాట చాలానే వినిపిస్తుంది. కానీ కీర్తి సురేష్ మాత్రం ఆ భావనని పూర్తిగా తలక్రిందులు చేసింది. వివాహం తర్వాత ఆమె ప్రొఫెషనల్‌ జోరు మరింత పెరిగింది. ప్రస్తుతం ‘రివాల్వర్ రీటా’ ప్రమోషన్స్‌తో బిజీగా ఉన్న కీర్తి, తన మనసులో చాలాకాలంగా దాచుకున్న ఓ పెద్ద కలను బయట పెట్టింది. అది నటనతో పాటు సినిమా నిర్మాణానికి, సృష్టికి సంబంధించినది కావడంతో ఇప్పుడు ఇండస్ట్రీలో హాట్‌ టాపిక్‌గా మారింది.

కీర్తి చెబుతున్నదేమిటంటే తాను ఒక స్క్రిప్ట్‌ను స్వయంగా రాసుకుంటోందట. చాలా కాలం నుంచే డైరెక్షన్‌ పై ఆసక్తి ఉందని, ఒక రోజు కెమెరా వెనక నిలబడి కథ చెప్పాలని ఎప్పటినుంచో కోరుకుంటోందని చెప్పింది. గ్లామర్‌ ఇమేజ్‌లోనే పరిమితమవకుండా, తనలోని క్రియేటివ్‌ సామర్థ్యాలను పెద్దగా చూపించాలని ఆమెలో ఉన్న తపన స్పష్టంగా కనిపిస్తోంది. ఇది నిజమైతే, కంగనా రనౌత్‌ తరహాలో కీర్తి కూడా త్వరలో మెగాఫోన్‌ పట్టుకునే అవకాశం ఎక్కువే.

యాక్టింగ్‌ చేస్తూనే డైరెక్షన్‌ను బ్యాలెన్స్‌ చేయడం సాధారణ విషయం కాదు. అజయ్‌ దేవగన్‌, కంగనా లాంటి కొద్దిమంది మాత్రమే ఈ రెండింటినీ సమర్థంగా నిర్వహించారు. ఇప్పుడు కీర్తి కూడా ఆ జాబితాలో చేరాలని ప్రయత్నించడం ఆమె మల్టీటాలెంట్‌ ను చూపిస్తుంది. ‘మహానటి’లో సావిత్రిగా నటించి మెప్పించిన కీర్తి, నిజ జీవితంలో కూడా సావిత్రి గారి స్టైల్లో డైరెక్షన్‌ వైపు అడుగులు వేయడం యాదృచ్ఛికమైనా ఆసక్తికరం.

వ్యక్తిగత జీవితంపై మాట్లాడుతూ తన భర్త సినిమాలకు పూర్తిగా దూరంగా ఉంటారని స్పష్టం చేసింది. “ఆయన నా సినిమాల విషయంలో జోక్యం చేసుకోరు; నాతో నటించే ప్రసక్తే లేదు” అంటూ నవ్వుతూ చెప్పింది. ఇది చూస్తే, కీర్తి తన వ్యక్తిగత మరియు వృత్తి జీవితాలను ఎంత సమతూకంగా నిర్వహిస్తుందో అర్థమవుతోంది. భర్త సపోర్ట్‌ ఉన్నా, తన కెరీర్‌ను తనే నిర్మించుకోవాలనే ఆత్మవిశ్వాసం ఆమె మాటల్లో వినిపించింది.

ఇదిలావుంటే, మహిళల భద్రతపై కీర్తి చేసిన వ్యాఖ్యలు ఆలోచింపజేసేలా ఉన్నాయి. తనకు, సమంతకు సంబంధించిన డీప్‌ ఫేక్‌ వీడియోలు చూసి ఎంతగా భయపడ్డానో వెల్లడించింది. టెక్నాలజీ అభివృద్ధి చెందుతున్న కొద్దీ మహిళల భద్రతపై కొత్త ప్రమాదాలు పెరుగుతున్నాయని తెలిపింది. విదేశాల్లో ఉన్నట్లు కఠిన చట్టాలు మన దేశంలోనూ త్వరగా రావాలని కోరుకుంది.