కింగ్ సినిమాలో షారుఖ్‌తో కలిసి స్టెప్పులేయనున్న కరీనా కపూర్

బాలీవుడ్ బాద్‌షా షారుఖ్ ఖాన్ తన తాజా యాక్షన్ డ్రామా కింగ్ తో ప్రేక్షకులను అలరించేందుకు సిద్ధమవుతున్నారు. ఈ సినిమా 2026 డిసెంబర్ 24న థియేటర్లలో విడుదల కానుంది. ఈ చిత్రానికి సంబంధించిన ఓ ఆసక్తికరమైన వార్త ఇప్పుడు అభిమానుల్లో ఉత్సాహాన్ని పెంచుతోంది. ప్రముఖ నటి కరీనా కపూర్ ఖాన్ ఈ సినిమాలో ప్రత్యేక డ్యాన్స్ నంబర్‌లో కనిపించనున్నట్లు సమాచారం. తాజాగా ఆమె కింగ్ సినిమా సెట్స్‌లోని ఓ ఫొటోను సోషల్ మీడియాలో పంచుకున్నారు. ఇది షారుఖ్‌తో కలిసి స్టెప్పులేసిన ప్రత్యేక పాటకు సంబంధించినదిగా తెలుస్తోంది. ఈ ఫొటోతో పాటు “మనమిద్దరం కలిసి డ్యాన్స్ చేద్దాం.. ఆగలేకపోతున్నా” అంటూ ఆమె చేసిన పోస్ట్ అభిమానుల్లో ఆసక్తిని పెంచింది.

ఈ పాటకు డాడీ కూల్ అనే టైటిల్‌ను పరిశీలిస్తున్నట్లు సమాచారం. సచిన్-జిగర్ ఈ పాటకు సంగీతం అందించారు. త్వరలోనే ఈ సాంగ్ విడుదలయ్యే అవకాశం ఉందని సినీ వర్గాల్లో చర్చ జరుగుతోంది. గతంలో పలు సినిమాల్లో కలిసి నటించిన షారుఖ్, కరీనా దాదాపు 15 ఏళ్ల తర్వాత రా.వన్ అనంతరం మరోసారి స్క్రీన్‌పై సందడి చేయనుండటం విశేషం. సిద్ధార్థ్ ఆనంద్ దర్శకత్వంలో తెరకెక్కుతున్న కింగ్లో ఈ స్టార్ జోడీ ఎలాంటి మ్యాజిక్ చేస్తుందో చూడాలని అభిమానులు ఆసక్తిగా ఎదురుచూస్తున్నారు.