ఘంటసాల ది గ్రేట్ మూవీ ప్రివ్యూ చూసిన సెలెబ్రిటీలు

దిగ్గజ గాయకుడు, సంగీత దర్శకుడు ఘంటసాల వారి జీవిత చరిత్ర ఆధారంగా దర్శకుడు సి.హెచ్. రామారావు తెరకెక్కించిన చిత్రం ‘ఘంటసాల ది గ్రేట్’. అన్యుక్త్ రామ్ పిక్చర్స్ బ్యానర్‌పై శ్రీమతి సి.హెచ్. ఫణి ఈ చిత్రాన్ని నిర్మించారు. ఘంటసాల వారి పాత్రలో సింగర్ కృష్ణ చైతన్య నటించగా, కీలక పాత్రలో సుమన్ కనిపించనున్నారు. ఈ సినిమా జనవరి 2 న ప్రేక్షకుల ముందుకు రానుంది. విడుదలకు ముందు స్వరవాహిని, శ్రీభారతి మ్యూజిక్ అకాడమీ సంయుక్తంగా ‘ఘంటసాల ది గ్రేట్ స్పెషల్ మ్యూజికల్ నైట్’ అనే ప్రత్యేక కార్యక్రమాన్ని నిర్వహించారు. ఈ వేడుకలో సినిమా విశేషాలతో పాటు ఘంటసాల వారి గొప్పతనాన్ని పలువురు ప్రముఖులు గుర్తు చేశారు.

ఈ సందర్భంగా దర్శకుడు సి.హెచ్. రామారావు మాట్లాడుతూ, ఘంటసాల వారి పాటల గొప్పతనం అందరికీ తెలిసినదేనని, కానీ ఆయన వ్యక్తిత్వాన్ని తెలియజేయాలనే ఉద్దేశంతోనే ఈ సినిమా తీశామని అన్నారు. శ్రీశ్రీ గారు ఘంటసాల వారి గానాన్ని విని మంత్రముగ్ధులైన సందర్భాన్ని గుర్తు చేస్తూ, అంత గొప్ప గాయకుడైనందుకే ఈ చిత్రానికి ‘ఘంటసాల ది గ్రేట్’ అనే టైటిల్ పెట్టామని చెప్పారు. ఈ సినిమాను విడుదల చేస్తున్న శోభా రాణికి కృతజ్ఞతలు తెలిపారు. ఇప్పటికే ఈ చిత్రం ఆస్ట్రేలియాలో ప్రదర్శించామని, తెలుగు ప్రేక్షకుల ఆశీర్వాదాలతో విజయం సాధించాలని ఆకాంక్షించారు. నిర్మాతలు సి.కళ్యాణ్, టీఎస్ రావు, శోభా రాణి తదితరులు మాట్లాడుతూ, ఘంటసాల వారి జీవితంపై తీసిన ఈ చిత్రం తప్పకుండా ఘన విజయం సాధిస్తుందని, ఇది ప్రతి తెలుగు వాడు చూడాల్సిన సినిమా అని అన్నారు.

వకుళాభరణం కృష్ణ మోహన్, దర్శకుడు సముద్ర, లిరిక్ రైటర్ వెన్నిగల రాంబాబు, సంగీత దర్శకుడు రవి శంకర్, కర్రి బాలాజీ, దర్శకుడు మల్లిఖార్జున్ వంటి ప్రముఖులు ఘంటసాల వారి గానం సూర్యచంద్రులు ఉన్నంత వరకు నిలిచిపోతుందని అన్నారు. తెలుగు సినిమా ఎదుగుదలకు ఘంటసాల వారే ప్రధాన స్థంభమని, ఆయన జీవితాన్ని తెరపై చూపిన ఈ ప్రయత్నం గొప్పదని ప్రశంసించారు. అంతేకాకుండా ఈ సినిమాను సెలెబ్రిటీల కోసం ప్రత్యేకంగా ప్రదర్శించారు. ఈ ప్రివ్యూను రఘు కుంచె, కౌసల్య, విజయలక్ష్మీ తదితరులు వీక్షించి, ఇది ప్రతి తెలుగు ప్రేక్షకుడు తప్పక చూడాల్సిన అద్భుతమైన సినిమా అని, ఘంటసాల వారి వ్యక్తిత్వాన్ని తెలుసుకునే అవకాశం ఈ చిత్రంతో లభిస్తుందని అభిప్రాయపడ్డారు.