కొడుక్కి రామ్ చరణ్ పేరు.. అభిమాని ప్రేమకు మెగాస్టార్ చిరంజీవి ఫిదా!

మెగాస్టార్ చిరంజీవికి అభిమానులపై ఉన్న ప్రేమకు మరో ఉదాహరణగా నిలిచే ఘటన చోటుచేసుకుంది. ప్రస్తుతం ఆయన నటిస్తున్న ‘మెగా 158’ చిత్రంలో కెమెరా విభాగంలో పనిచేస్తున్న నివాస్.. తాను రామ్ చరణ్‌కు వీరాభిమానినని చిరంజీవితో చెప్పాడు. తన అభిమానానికి గుర్తుగా తన కుమారుడికి ‘జస్వంత్ రామ్ చరణ్’ అని పేరు పెట్టుకున్నట్లు వెల్లడించాడు. ఈ విషయం తెలుసుకున్న చిరంజీవి ఎంతో సంతోషించి, నివాస్ కుటుంబాన్ని తన ఇంటికి ఆహ్వానించారు.

చిరంజీవి నివాసానికి వెళ్లిన నివాస్ కుటుంబానికి అక్కడ మరో ప్రత్యేకమైన సర్‌ప్రైజ్ ఎదురైంది. రామ్ చరణ్ కూడా వారిని ఆప్యాయంగా పలకరించి, వారితో కొంత సమయం గడిపారు. ముఖ్యంగా చిన్నారి జస్వంత్‌తో చరణ్ సరదాగా గడపడంతో ఆ కుటుంబం ఆనందానికి అవధులు లేకుండా పోయాయి. అనంతరం చిరంజీవి, రామ్ చరణ్‌తో కలిసి నివాస్ కుటుంబం ఫొటోలు దిగింది. ఈ అరుదైన క్షణాలకు సంబంధించిన ఫొటోలు సోషల్ మీడియాలో వైరల్ కావడంతో మెగా అభిమానులు ఆనందం వ్యక్తం చేస్తున్నారు. సాధారణ అభిమానిపై మెగా కుటుంబం చూపించిన ఆప్యాయతను ప్రశంసిస్తూ కామెంట్లు చేస్తున్నారు.