

ప్రముఖ దర్శకుడు వీవీ వినాయక్ తన సినీ ప్రయాణం, విజయాలు, అపజయాలు, ముఖ్యంగా జూనియర్ ఎన్టీఆర్తో తెరకెక్కించిన ‘అదుర్స్’ సినిమా గురించి ఓ ఇంటర్వ్యూలో ఆసక్తికర విషయాలు వెల్లడించారు. సినిమా నిర్మాణంలో ఎదురయ్యే సవాళ్లను ప్రస్తావిస్తూ.. కథలో ఏదైనా అంశం సరిగ్గా కుదరకపోతే ఎంతో ఒత్తిడికి గురవుతామని చెప్పారు. తనకు ‘నో’ చెప్పడం చాలా కష్టమని, చిన్న విషయాలకు కూడా అలా చెప్పలేనని తెలిపారు. ఏ సినిమా తీసినా విజయం సాధించాలనే ఉద్దేశంతోనే తెరకెక్కిస్తారని, ఏ చిత్రం ప్రేక్షకులకు నచ్చుతుందో ముందుగా ఎవరూ అంచనా వేయలేరని అన్నారు. ఎడిటింగ్ సమయంలో బాగుందని భావించిన సన్నివేశాలకు థియేటర్లలో ఆశించిన స్పందన రాకపోవచ్చని, చిన్న సన్నివేశాలకే ప్రేక్షకులు పెద్దగా నవ్వవచ్చని వివరించారు. ‘ఛత్రపతి’ హిందీ రీమేక్ అనుకోకుండా కుదిరిందని, విజయేంద్ర ప్రసాద్ అందించిన కథతో ఆ సినిమా రూపొందించామని గుర్తుచేసుకున్నారు.
జూనియర్ ఎన్టీఆర్తో చేసిన ‘ఆది’, ‘అదుర్స్’ సినిమాల గురించి మాట్లాడుతూ.. ‘అదుర్స్’ కథను తెరకెక్కించాలంటే ఎంతో ధైర్యం అవసరమైందని వినాయక్ చెప్పారు. ఎన్టీఆర్ డైలాగ్ డెలివరీ, బ్రహ్మానందం కామెడీ టైమింగ్ ఆ సినిమాకు ప్రధాన ఆకర్షణలని పేర్కొన్నారు. ‘అదుర్స్ 2’పై వస్తున్న వార్తల గురించి స్పందిస్తూ.. కోన వెంకట్ సిద్ధంగా ఉన్నారని, ఎన్టీఆర్ కూడా సానుకూలంగా ఉన్నారని విన్నానని చెప్పారు. అయితే, మొదటి భాగం స్థాయిని అందుకునేలా సీక్వెల్ తీయగలననే నమ్మకం తనకు లేదని, బ్రహ్మానందం టైమింగ్ను మళ్లీ పునరావృతం చేయడం కష్టమని అభిప్రాయపడ్డారు. దివంగత దర్శకుడు కే. విశ్వనాథ్ ‘అదుర్స్’ సినిమాను ఎంతో ఇష్టంగా చూస్తానని చెప్పడం తనకు దక్కిన గొప్ప గుర్తింపు అని వినాయక్ వెల్లడించారు. విశ్వనాథ్ వంటి గొప్ప దర్శకుడి ప్రశంసలు ఏ అవార్డుకూ తీసిపోవని అన్నారు. ‘అదుర్స్’ సినిమాలో బ్రాహ్మణులను కించపరిచారనే విమర్శలపై స్పందిస్తూ.. ఆ వ్యాఖ్యలు మరో సినిమా గురించి చేసినవని, ఎవరినీ అవమానించాలనే ఉద్దేశం తమకు లేదని స్పష్టం చేశారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!