విభిన్న పాత్రలే లక్ష్యం: వరుణ్ తేజ్

మెగా ప్రిన్స్ వరుణ్ తేజ్ ఇటీవల చిత్రాలు ఆశించిన విజయాన్ని అందుకోకపోయినా, నిరాశ చెందకుండా ‘కొరియన్ కనకరాజు’తో ప్రేక్షకుల ముందుకు రానున్నారు. మేర్లపాక గాంధీ దర్శకత్వంలో రూపొందుతున్న ఈ ఇండో-కొరియన్ హారర్ కామెడీ చిత్రంలో రితికా నాయక్, సత్య, సునీల్ కీలక పాత్రల్లో నటిస్తున్నారు. ఆగస్టు 7న విడుదలకు సిద్ధమైన ఈ సినిమా ప్రమోషన్స్‌లో భాగంగా వరుణ్ తేజ్ ఆసక్తికర వ్యాఖ్యలు చేశారు. బాలీవుడ్ స్టార్ ఆమిర్ ఖాన్‌ను తనకు ఆదర్శంగా భావిస్తూ, విభిన్న కథలు, ప్రత్యేక పాత్రలతో కెరీర్‌ను నిర్మించుకోవాలని ఎప్పటి నుంచో ప్రయత్నిస్తున్నట్లు తెలిపారు.

ఆమిర్ ఖాన్ చేసే ప్రతి పనిలోనూ పరిపూర్ణత కనిపిస్తుందని ప్రశంసించిన వరుణ్ తేజ్, ‘లగాన్’, ‘తలాష్’, ‘3 ఇడియట్స్’ వంటి భిన్నమైన సినిమాలను ఉదాహరణగా పేర్కొన్నారు. తన కెరీర్‌లో కూడా అలాంటి సమతౌల్యం సాధించాలనుకున్నప్పటికీ, ఇటీవల అది కొంత మేర దెబ్బతిన్నట్లు అంగీకరించారు. అయితే ‘కొరియన్ కనకరాజు’ కోసం ముందస్తు ప్రణాళికతో పని చేశానని, షూటింగ్‌కు ముందు దర్శకుడితో విస్తృతంగా చర్చలు జరిపానని వెల్లడించారు. ఈ సినిమా ద్వారా మళ్లీ సరైన ట్రాక్‌లోకి వస్తాననే నమ్మకాన్ని వ్యక్తం చేశారు.