టాక్సిక్‌కు భారీ షాక్‌?

రాకింగ్‌ స్టార్‌ యశ్‌ హీరోగా గీతూ మోహన్‌దాస్‌ దర్శకత్వంలో తెరకెక్కిన పాన్‌ ఇండియా చిత్రం ‘టాక్సిక్‌’ భారీ అంచనాల మధ్య విడుదలైంది. తొలి రోజు భారీగా టికెట్లు అమ్ముడై మంచి ఓపెనింగ్‌ సాధించిన ఈ సినిమాకు రెండో రోజు బుకింగ్స్‌లో గట్టి ఎదురుదెబ్బ తగిలినట్లు సమాచారం. బుక్‌మైషోలో రెండో రోజు టికెట్‌ సేల్స్‌ దాదాపు 60 శాతం తగ్గినట్లు తెలుస్తోంది. రెండో రోజు 3.70 లక్షలకు పైగా టికెట్లు అమ్ముడైనట్లు సమాచారం. వర్కింగ్‌ డే కావడంతో కొంత తగ్గుదల సహజమే అయినప్పటికీ, అదే సమయంలో ‘ఇరుముడి’ బలమైన బుకింగ్స్‌ నమోదు చేయడం ఆసక్తికరంగా మారింది.

రవితేజ నటించిన ‘ఇరుముడి’ తక్కువ తెరలు అందుబాటులో ఉన్నప్పటికీ రెండో రోజు 5 లక్షలకు పైగా టికెట్లు అమ్ముడైనట్లు సమాచారం. వర్కింగ్‌ డేలోనూ రీజినల్‌ సినిమాకు ఈ స్థాయి స్పందన రావడం ట్రేడ్‌ వర్గాల దృష్టిని ఆకర్షిస్తోంది. పాన్‌ ఇండియా స్థాయిలో భారీ ప్రచారం పొందిన ‘టాక్సిక్‌’తో పోలిస్తే ‘ఇరుముడి’ తక్కువ స్క్రీన్లతోనే బలమైన పోటీ ఇవ్వడం చర్చనీయాంశంగా మారింది. అయితే వారాంతంలో రెండు సినిమాల బుకింగ్స్‌, వసూళ్లు మరింత పెరిగే అవకాశం ఉండటంతో.. చివరకు ఏ చిత్రం ఆధిపత్యం సాధిస్తుందన్నది ఆసక్తికరంగా మారింది.