మెగాస్టార్ కోసం అదిరిపోయే పాట సిద్ధం?

మెగాస్టార్ చిరంజీవి హీరోగా దర్శకుడు కొల్లి బాబీ తెరకెక్కిస్తున్న తాజా చిత్రం ‘కాకా’పై ఇప్పటికే మంచి అంచనాలు ఏర్పడ్డాయి. గతంలో వీరిద్దరి కలయికలో వచ్చిన ‘వాల్తేరు వీరయ్య’ భారీ విజయాన్ని అందుకోవడంతో ఈ కొత్త సినిమాపై అభిమానుల్లో ఆసక్తి మరింత పెరిగింది. ప్రస్తుతం చిత్రీకరణ చివరి దశకు చేరుకున్నట్లు తెలుస్తోంది. కొంత భాగం మాత్రమే మిగిలి ఉండగా, తాజాగా ఓ ఆసక్తికరమైన సమాచారం బయటకు వచ్చింది. ఈ సినిమాలో ప్రత్యేక ఆకర్షణగా నిలిచే ఓ పాటను ప్రస్తుతం చిత్రీకరిస్తున్నట్లు ప్రచారం జరుగుతోంది. శేఖర్ మాస్టర్ పర్యవేక్షణలో ఈ పాట షూటింగ్ జరుగుతున్నట్లు సమాచారం.

అంతేకాదు, ఇది ప్రత్యేక నృత్యగీతం అని సినీ వర్గాల్లో చర్చ నడుస్తోంది. దీంతో మరోసారి చిరంజీవి తనదైన నృత్యాలతో అభిమానులను అలరించనున్నారని తెలుస్తోంది. ఇప్పటివరకు ఈ సినిమా పూర్తిగా గంభీరమైన కథాంశంతో సాగుతుందని చాలామంది భావించారు. కానీ బాబీ మాత్రం కథలో వినోదం, మాస్ అంశాలు, అభిమానులు కోరుకునే అన్ని హంగులను జోడిస్తున్నట్లు సమాచారం. దీంతో సినిమాపై అంచనాలు మరింత పెరుగుతున్నాయి. థమన్ ఈ చిత్రానికి సంగీతం అందిస్తుండగా, కే వి ఎన్ ప్రొడక్షన్స్ నిర్మిస్తోంది. సంక్రాంతి కానుకగా జనవరి 13న ఈ సినిమాను భారీ స్థాయిలో విడుదల చేసేందుకు చిత్రబృందం సిద్ధమవుతోంది.