రేపు థియేటర్లలోకి 7 సినిమాలు రిలీజ్...బాక్సాఫీస్‌పై ఆసక్తి

గత వారం ఏకంగా 11 సినిమాలు థియేటర్లలో విడుదలైనప్పటికీ, బాక్సాఫీస్ వద్ద ఆశించిన స్థాయిలో ప్రేక్షకులను ఆకట్టుకోలేకపోయాయి. దీంతో అక్టోబర్ రెండో వారాంతంపై సినీ ప్రియుల్లో ఆసక్తి నెలకొంది. విక్టరీ వెంకటేష్‌ ఫ్యామిలీ ఎంటర్‌టైనర్‌ ‘ఆదర్శ కుటుంబం’ రేసు నుంచి తప్పుకున్నప్పటికీ, అక్టోబర్ 9న ఏడు కొత్త సినిమాలు థియేటర్లలోకి రానున్నాయి. వీటిలో శ్రీవిష్ణు నటించిన ‘కామ్రేడ్ కళ్యాణ్’పై ఎక్కువ అంచనాలు ఉన్నాయి. 1990ల ఉత్తరాంధ్ర నేపథ్యంలో తెరకెక్కిన ఈ పీరియాడిక్ ఎంటర్‌టైనర్‌లో శ్రీవిష్ణు నక్సలైట్ పాత్రలో కనిపించనున్నారు. మహిమా నంబియార్ హీరోయిన్‌గా నటించగా, రాధిక, షైన్ టామ్ చాకో, సత్య కీలక పాత్రలు పోషించారు. జానకిరామ్ మారెళ్ల దర్శకత్వం వహించిన ఈ చిత్రాన్ని కోన వెంకట్ సమర్పణలో వెంకటకృష్ణ కర్నాటి, సీతా కర్నాటి నిర్మించారు.

మరోవైపు ‘బా.. బా.. బ్లాక్ షీప్’ న్యూ ఏజ్ క్రైమ్ కామెడీగా ప్రేక్షకుల ముందుకు రానుంది. ఉపేంద్ర లిమాయే, టీనూ ఆనంద్, రాజా రవీంద్ర, విష్ణు ఓయ్ కీలక పాత్రల్లో నటించిన ఈ చిత్రానికి గుణి మంచికంటి దర్శకత్వం వహించారు. పాయల్ చెంగప్ప, బిగ్ బాస్ ఫేమ్ అమన్ మసూద్ నటించిన ‘మయూఖ’ సీట్ ఎడ్జ్ థ్రిల్లర్‌గా విడుదల కానుంది. ‘చకోర’, ‘గుడ్ టైమ్’తో పాటు తమిళ డబ్బింగ్ చిత్రం ‘సప్త సాగరాలు సప్త గిరులు’, హిందీలో విజయవంతమైన ఆధ్యాత్మిక చిత్రం ‘హనుమాన్ అంశ్’ కూడా తెలుగులో విడుదల కానున్నాయి. మొత్తంగా ఐదు స్ట్రెయిట్ తెలుగు సినిమాలు, రెండు డబ్బింగ్ చిత్రాలు ఈ వారాంతంలో బాక్సాఫీస్ వద్ద పోటీ పడనున్నాయి.