డైట్‌లో ఉన్నవారికి ఏది బెస్ట్? గుడ్లపై డాక్టర్ల అభిప్రాయం

ఉరుకుల పరుగుల నేటి జీవనశైలిలో చాలామంది వివిధ అనారోగ్య సమస్యల బారిన పడుతున్నారు. ఈ పరిస్థితుల్లో ప్రజలు ఫిట్‌నెస్‌, ఆరోగ్యకరమైన జీవన విధానంపై ఎక్కువగా దృష్టి పెడుతున్నారు. ముఖ్యంగా ఆరోగ్యకరమైన ఆహారపు అలవాట్లు అలవరుచుకోవాలని ప్రయత్నిస్తున్నారు. ఫిట్‌నెస్ ఔత్సాహికులు, జిమ్‌కు వెళ్లేవారు తమ ప్రోటీన్ అవసరాలపై ప్రత్యేక శ్రద్ధ చూపుతారు. ప్రోటీన్ లోటును భర్తీ చేయడానికి చాలా మంది గుడ్లను ఆహారంలో చేర్చుకుంటారు. అయితే ఉడికించిన గుడ్డు మంచిదా, లేక ఆమ్లెట్ ఎక్కువ ప్రయోజనకరమా అనే సందేహం చాలామందిలో ఉంటుంది.

బరువు తగ్గాలని కోరుకునేవారికి ఉడికించిన గుడ్లు ఉత్తమ ఎంపికగా నిపుణులు సూచిస్తున్నారు. ఉడికించిన గుడ్లలో అదనపు నూనె లేదా కొవ్వు ఉండదు కాబట్టి క్యాలరీలు తక్కువగా ఉంటాయి. ఇవి ప్రోటీన్‌తో సమృద్ధిగా ఉండి ఎక్కువసేపు కడుపు నిండిన భావనను కలిగిస్తాయి, తద్వారా ఆకలిని నియంత్రించడంలో సహాయపడతాయి. రోజూ అల్పాహారంగా ఒకటి లేదా రెండు ఉడికించిన గుడ్లు తినడం వల్ల జీవక్రియ మెరుగుపడి కొవ్వు కరిగేందుకు దోహదం చేస్తుంది. అందుకే డైట్‌లో ఉన్నవారికి ఉడికించిన గుడ్లు ఎంతో ప్రయోజనకరం.

మరోవైపు బరువు పెరగాలని అనుకునేవారికి ఆమ్లెట్ మంచి ఎంపిక కావచ్చు. ఆమ్లెట్ తయారీలో నూనె, వెన్న, ఉల్లిపాయలు, టమోటాలు, కొన్నిసార్లు జున్ను వంటివి ఉపయోగించడం వల్ల క్యాలరీలు పెరుగుతాయి. ఇది వ్యాయామం చేసే వారికి ఎక్కువ శక్తిని అందించి కండరాల నిర్మాణానికి సహాయపడుతుంది. అయితే ఉడికించిన గుడ్డు అయినా, ఆమ్లెట్ అయినా సరైన పరిమాణంలో తీసుకుంటే ఆరోగ్యానికి మేలు చేస్తాయి. తక్కువ నూనెతో చేసిన ఆమ్లెట్ కూడా ఆరోగ్యకరమే. ఏవైనా అనారోగ్య సమస్యలు ఉన్నవారు గుడ్లు ఆహారంలో చేర్చే ముందు ఆరోగ్య నిపుణుల సలహా తీసుకోవడం మంచిదని డైటీషియన్లు సూచిస్తున్నారు.

గమనిక: ఇక్కడ ఇచ్చిన సమాచారం కేవలం అవగాహన కోసం మాత్రమే. దీనికి మేము ఎలాంటి బాధ్యత వహించము. ఏవైనా ఆరోగ్య సమస్యలు ఉంటే తప్పనిసరిగా వైద్యుడిని లేదా న్యూట్రిషనిస్ట్‌ను సంప్రదించి వారి సలహా మేరకు అనుసరించండి.