పీరియడ్స్‌కు ముందు అర్ధరాత్రి స్వీట్స్‌ తినాలనిపిస్తుందా? కారణం ఇదేనట!

పీరియడ్స్‌కు ముందు అర్ధరాత్రి స్వీట్స్‌ తినాలనిపించడం, సాధారణం కంటే ఎక్కువ ఆకలి వేయడం, ఆందోళనగా అనిపించడం, నిద్ర సరిగా పట్టకపోవడం వంటి మార్పులు కేవలం ఆహారపు అలవాట్లు లేదా మనోబలానికి సంబంధించినవి కాకపోవచ్చని పోషకాహార నిపుణురాలు అంజలి ముఖర్జీ తెలిపారు. ఇవి ప్రీమెన్‌స్ట్రువల్‌ సిండ్రోమ్‌ (PMS)తో సంబంధం కలిగి ఉండొచ్చని వివరించారు. PMS వల్ల మూడ్‌, ఆకలి, నిద్ర, జీర్ణక్రియలో మార్పులు కనిపించవచ్చన్నారు. ప్రతి నెలా పీరియడ్స్‌కు ముందు ఎలాంటి మార్పులు వస్తున్నాయో గుర్తిస్తే.. వాటిని ముందుగానే ఎదుర్కొనేందుకు సిద్ధంగా ఉండొచ్చని సూచించారు.

ఈ సమయంలో శరీరానికి తగిన పోషకాలు అందించడం ముఖ్యమని అంజలి ముఖర్జీ పేర్కొన్నారు. స్వీట్స్‌పై కోరిక వచ్చిన వెంటనే వాటివైపు వెళ్లకుండా క్రమం తప్పకుండా సమతుల ఆహారం తీసుకోవాలని సూచించారు. తగినంత నీరు తాగడంతో పాటు కాల్షియం, మెగ్నీషియం లభించే ఆహారాన్ని తీసుకోవడం PMS సమయంలో శరీరానికి తోడ్పడవచ్చని తెలిపారు. ముఖ్యంగా పీరియడ్స్‌కు ముందు ఆందోళన పెరిగితే.. అది నెలసరి చక్రంతో సంబంధం ఉన్న తాత్కాలిక మార్పు కావచ్చని గుర్తించడం ఉపయోగకరమన్నారు. లక్ష్యం శరీరంలోని మార్పులను అడ్డుకోవడం కాదని, సరైన పోషకాహారంతో శరీరానికి మద్దతు ఇవ్వడమేనని ఆమె పేర్కొన్నారు.