చలికాలంలో జుట్టు ఎక్కువగా రాలిపోతుందా? ఈ జాగ్రత్తలు పాటించండి

చలికాలంలో ఉష్ణోగ్రతలు తగ్గడంతో రక్తనాళాలు ఇరుకుగా మారి, జుట్టు కుదుళ్లకు ఆక్సిజన్‌, పోషకాలు సరైన మోతాదులో చేరవు. దీని వల్ల జుట్టు బలహీనపడి ఎక్కువగా రాలిపోతుంది. దీనిని నివారించాలంటే రోజూ నాలుగు నుంచి ఐదు నిమిషాలు తలపై తేలికగా మసాజ్ చేసుకోవాలి. అలాగే నిత్యం వాకింగ్ వంటి తేలికపాటి వ్యాయామం చేయడం ద్వారా రక్త ప్రసరణ మెరుగుపడుతుంది. పాలకూర, బీట్‌రూట్, దానిమ్మ, వాల్‌నట్స్, గుమ్మడిగింజలు వంటి ఆహార పదార్థాలు జుట్టు ఆరోగ్యానికి మేలు చేస్తాయి.

చలికాలంలో సూర్యకాంతి తక్కువగా ఉండటం వల్ల విటమిన్ డి లోపం ఏర్పడి జుట్టు సమస్యలు పెరుగుతాయి. అందుకే విటమిన్ డి ఉన్న ఆహారం తీసుకోవాలి. అలాగే వేడినీటితో తలస్నానం చేయడం వల్ల తల చర్మం పొడిబారి జుట్టు రాలే అవకాశం ఉంటుంది. గోరువెచ్చని నీటితోనే తలస్నానం చేయడం మంచిది. రోజూ షాంపూ వాడటం, రాత్రంతా నూనె రాసుకుని ఉండటం కూడా జుట్టు ఆరోగ్యానికి హానికరం. తలస్నానం చేయడానికి గంట ముందు మాత్రమే నూనె రాసుకోవడం ఉత్తమం.