భోజనం చేస్తూ నీరు తాగితే ప్రమాదమా? వైద్యులు చెప్పే నిజం

ఆహారం, నీరు మన ఆరోగ్యానికి అత్యంత ముఖ్యమైనవి. అయితే వాటిని ఎప్పుడు, ఎలా తీసుకుంటామన్నది కూడా శరీరంపై ప్రభావం చూపుతుంది. ఆయుర్వేదం ప్రకారం తినే సమయం, నీరు తాగే సమయం జీర్ణక్రియలో కీలక పాత్ర పోషిస్తాయి. చాలా మంది భోజనం సమయంలో లేదా వెంటనే ఎక్కువగా నీరు తాగుతుంటారు. మరికొందరు రోజంతా చాలా తక్కువ నీరు తాగుతారు. ఇటువంటి అలవాట్లు జీర్ణవ్యవస్థ సమతుల్యతను దెబ్బతీసే అవకాశం ఉంది. దీంతో కడుపు బరువుగా అనిపించడం, గ్యాస్, అజీర్ణం, ఉబ్బరం లేదా ఆమ్లత్వం వంటి సమస్యలు రావచ్చు.

చాలా సందర్భాల్లో ప్రజలు ఈ లక్షణాలను చిన్న సమస్యలుగా భావించి పట్టించుకోరు. కానీ ఇలాంటి అలవాట్లు ఎక్కువ కాలం కొనసాగితే జీర్ణ సమస్యలు మరింత పెరిగే ప్రమాదం ఉంటుంది. అందుకే తినే ఆహారం, నీరు తాగే విధానం మధ్య సమతుల్యతను పాటించడం చాలా అవసరం. అలా చేస్తే జీర్ణవ్యవస్థ సరిగా పనిచేసి, శరీరం ఆహారంలోని పోషకాలను సరిగ్గా గ్రహించగలదు.

ఢిల్లీ ప్రభుత్వ ఆయుర్వేద డైరెక్టర్ డాక్టర్ ఆర్.పీ. పరాశర్ తెలిపిన ప్రకారం భోజనం సమయంలో ఎక్కువగా నీరు తాగకూడదని ఆయుర్వేదం సూచిస్తుంది. అవసరమైతే కొద్దిగా గోరువెచ్చని నీరు తాగవచ్చు. సాధారణంగా భోజనం చేసిన తర్వాత సుమారు 30 నిమిషాల తరువాత నీరు తాగడం మంచిదని నిపుణులు చెబుతున్నారు. అలాగే భోజనం ముందు కూడా కొంత సమయం గ్యాప్‌తో నీరు తాగడం జీర్ణక్రియకు సహాయకరంగా ఉంటుంది.

గమనిక:

ఇక్కడ ఇచ్చిన సమాచారం కేవలం అవగాహన కోసం మాత్రమే. దీనికి మేము ఎలాంటి బాధ్యత వహించము. ఏవైనా ఆరోగ్య సమస్యలు ఉంటే తప్పనిసరిగా వైద్యుడిని లేదా న్యూట్రిషనిస్ట్‌ను సంప్రదించి వారి సలహా మేరకు అనుసరించండి.