యాంటీఆక్సిడెంట్స్‌తో కాఫీ ఆరోగ్యానికి మేలు - డాక్టర్ల సూచనలు

డాక్టర్ల మాటల్లో చెప్పాలంటే, యాంటీఆక్సిడెంట్స్‌కు మంచి మూలంగా కాఫీ గుర్తింపు పొందింది. కాఫీలో ఉండే పాలీఫీనాల్స్‌ శరీరంలో ఇన్‌ఫ్లమేషన్‌ను తగ్గించడంలో సహాయపడటంతో పాటు మెదడు చురుకుదనాన్ని పెంచుతాయని వైద్య నిపుణులు పేర్కొంటున్నారు. అయితే టీతో పోలిస్తే కాఫీలో కెఫీన్‌ పరిమాణం ఎక్కువగా ఉండటం వల్ల అధికంగా తీసుకుంటే ఆందోళన, గుండె స్పందన వేగం పెరగడం, అసిడిటీ వంటి సమస్యలు రావచ్చని డాక్టర్లు హెచ్చరిస్తున్నారు. ఇటీవల కాఫీలో నెయ్యి కలిపి తాగే ట్రెండ్‌పై కూడా వైద్యులు స్పందిస్తున్నారు. డాక్టర్ల ప్రకారం, నెయ్యిలో ఉండే బ్యూటిరిక్‌ యాసిడ్‌ పేగుల ఆరోగ్యానికి కొంత మేలు చేయవచ్చు, మలబద్ధకం తగ్గించడంలో సహాయపడే అవకాశం ఉంది. అలాగే కొందరికి ఎక్కువసేపు శక్తివంతంగా ఉండటం, ఆకలి ఆలస్యంగా వేయడం వంటి లాభాలు కనిపించవచ్చు. కానీ నెయ్యి ఎక్కువ క్యాలరీలు, కొలెస్ట్రాల్‌ కలిగిన కొవ్వు పదార్థం కావడంతో ఇది అందరికీ సరిపోదని వైద్యులు స్పష్టం చేస్తున్నారు. ముఖ్యంగా బరువు తగ్గాలనుకునేవారు, కొలెస్ట్రాల్‌ లేదా అసిడిటీ సమస్యలు ఉన్నవారు జాగ్రత్తగా ఉండాలని సూచిస్తున్నారు. అప్పుడప్పుడూ, పరిమితంగా తీసుకుంటే పెద్ద హానీ ఉండకపోయినా, కేవలం ట్రెండ్‌ కోసం తప్పనిసరిగా అలవాటు చేసుకోవాల్సిన అవసరం లేదని డాక్టర్లు అంటున్నారు. 

గమనిక : మేము అందించిన సమాచారం కేవలం అవగాహన కోసం మాత్రమే. దీనికి మేము ఎటువంటి బాధ్యత వహించము. ఏదైనా ఆరోగ్య సమస్య ఉంటే తప్పనిసరిగా వైద్యుడిని, న్యూట్రిషనిస్ట్‌ను సంప్రదించి వారి సలహా మేరకు అనుసరించండి.