రామ్ కొత్త ప్రాజెక్ట్‌లో హీరోయిన్ ఎవరు?

ఎనర్జిటిక్ స్టార్ రామ్ పోతినేని తన కెరీర్‌లోనే అత్యంత ప్రతిష్ఠాత్మకంగా భావిస్తున్న కొత్త చిత్రాన్ని భారీ స్థాయిలో సిద్ధం చేస్తున్నట్లు సినీ వర్గాల్లో చర్చ నడుస్తోంది. ఈ ప్రాజెక్ట్‌కు సంబంధించిన ప్రతి అంశం ఆసక్తిని రేకెత్తిస్తుండగా, తాజాగా హీరోయిన్ ఎంపికపై వినిపిస్తున్న వార్తలు మరింత హాట్ టాపిక్‌గా మారాయి. కోలీవుడ్‌కు చెందిన అందాల నటి నివేత పెతురాజ్ ఈ చిత్రంలో కథానాయికగా కనిపించే అవకాశాలు ఉన్నట్లు ప్రచారం జరుగుతోంది. ఇటీవల విడుదలైన ‘సింగ్ గీతం’ చిత్రంలో ఆమె నటనకు ప్రేక్షకుల నుంచి మంచి ప్రశంసలు లభించడంతో మరోసారి ఆమె పేరు టాలీవుడ్‌లో వినిపిస్తోంది. ఈ సినిమాకు రామ్ స్వయంగా కథను రూపొందించినట్లు టాక్ వినిపిస్తుండటం విశేషం.

తన ఇమేజ్‌కు భిన్నంగా కొత్త తరహా కథనంతో ప్రేక్షకుల ముందుకు రావాలని ఆయన భావిస్తున్నట్లు తెలుస్తోంది. ఇప్పటికే ప్రీ ప్రొడక్షన్ కార్యక్రమాలు వేగంగా సాగుతున్నాయని సమాచారం. నిర్మాణ బాధ్యతలను కృష్ణ పోతినేని చేపట్టగా, అత్యాధునిక సాంకేతిక ప్రమాణాలతో చిత్రాన్ని తెరకెక్కించే ప్రయత్నం జరుగుతోందని చెబుతున్నారు.నివేతా ఎంపికపై ఇప్పటివరకు ఎలాంటి అధికారిక ప్రకటన రాకపోయినా, ఈ వార్త సోషల్ మీడియాలో వేగంగా వైరల్ అవుతోంది. పాత్రల రూపకల్పన, కథనం, విజువల్ ట్రీట్‌మెంట్ అన్నీ కొత్తగా ఉండబోతున్నాయనే ప్రచారం కూడా వినిపిస్తోంది. ఈ ఏడాది చివర్లో సినిమాను విడుదల చేయాలనే లక్ష్యంతో చిత్రబృందం ప్రణాళికలు రూపొందిస్తున్నట్లు తెలుస్తోంది.