సలార్ 2, వారణాసి, నాని ప్యారడైజ్ లో విలన్ గా పృథ్వీరాజ్ సుకుమారన్?

పృథ్వీరాజ్ సుకుమారన్ అన్ని భాషల్లో సినిమాలు చేస్తుంటాడు. స్వతహాగా మలయాళీ అయినప్పటికీ, హిందీ మరియు తెలుగులోనూ ఆయన నటించారు. పాన్ ఇండియా సినిమాల్లో కూడా తరచూ కనిపిస్తూ వస్తున్నారు. గతంలో ప్రభాస్ నటించిన సలార్ సినిమాలో విలన్ పాత్రతో మంచి గుర్తింపు సంపాదించారు. అలాగే మహేష్ బాబు–రాజమౌళి కాంబినేషన్‌లో రూపొందుతున్న వారణాసి సినిమాలో కూడా ఆయనే విలన్ అని ఇటీవల జరిగిన ఈవెంట్‌లో అధికారికంగా ప్రకటించారు. ఇప్పుడు మరో తెలుగు సినిమాలోనూ ప్రతినాయకుడిగా నటించబోతున్నారని వార్తలు వినిపిస్తున్నాయి.

నాని ప్రస్తుతం ది ప్యారడైజ్ సినిమాతో బిజీగా ఉన్నాడు. ఈ సినిమా మార్చి 26 న థియేటర్లలో విడుదల కానుంది. కొంతకాలంగా వాయిదా పడుతుందనే ప్రచారం జరిగినా, తాజాగా వచ్చిన అప్డేట్స్ ప్రకారం నిర్ణయించిన తేదీకే సినిమా రిలీజ్ అవుతుందని స్పష్టత ఇచ్చారు. దీని తర్వాత, ఓజీతో హిట్ అందుకున్న దర్శకుడు సుజీత్ దర్శకత్వంలో నాని కొత్త సినిమా చేయబోతున్నాడు. ఈ ప్రాజెక్ట్ గురించి ఇప్పటికే అధికారిక ప్రకటన వచ్చింది మరియు వచ్చే వేసవిలో షూటింగ్ మొదలయ్యే అవకాశం ఉంది.

ఈ సినిమా కోసం ఇప్పటినుంచే అన్ని ఏర్పాట్లు చేస్తున్నారు. ఈ క్రమంలోనే నాని–సుజీత్ సినిమాలో ఒక కీలక పాత్ర కోసం పృథ్వీరాజ్ సుకుమారన్‌ను తీసుకునే ఆలోచనలో ఉన్నారనే ప్రచారం జరుగుతోంది. ఇది నిజమై, ఆ పాత్ర హిట్ అయితే పృథ్వీరాజ్ తెలుగులో స్థిరపడటం ఖాయమే. ఇప్పటికే ధనుష్, దుల్కర్ సల్మాన్ లాంటి నటులు టాలీవుడ్‌లో మంచి స్థానం సంపాదించుకుంటున్నారు. ఇప్పుడు చూస్తుంటే పృథ్వీరాజ్ కూడా మెల్లగా తెలుగులో తన జెండా పాతే దిశగా అడుగులు వేస్తున్నట్లు కనిపిస్తోంది.