సూర్యతో మణిరత్నం కొత్త సినిమా?

దర్శకుడు మణిరత్నం తదుపరి ప్రాజెక్ట్‌పై సినీ వర్గాల్లో ఆసక్తికరమైన చర్చ జరుగుతోంది. ‘ఇంజి వెల్లం’ తర్వాత నటుడు సూర్యతో సినిమా చేయాలని మణిరత్నం భావిస్తున్నట్లు సమాచారం. దాదాపు ఎనిమిదేళ్ల క్రితమే సూర్యకు ఓ కథను వినిపించినట్లు ప్రచారం ఉంది. అయితే ప్రస్తుతం ఆ కథను పూర్తిగా కొత్తగా తీర్చిదిద్దుతూ, అవసరమైన మార్పులు, చేర్పులతో స్క్రిప్ట్‌ను సిద్ధం చేయాలని మణిరత్నం భావిస్తున్నట్లు టాక్‌ వినిపిస్తోంది.

సూర్య ఈ ప్రాజెక్ట్‌కు అంగీకరిస్తే సినిమా కార్యరూపం దాల్చే అవకాశం ఉందని సినీ వర్గాల్లో చర్చ జరుగుతోంది. మణిరత్నం దర్శకత్వం, సూర్య నటన కలిస్తే ఈ కాంబినేషన్‌పై ఆసక్తి నెలకొంది. కథ, సూర్య పోషించే పాత్ర, నేపథ్యం ఎలా ఉంటాయన్న దానిపై అభిమానుల్లోనూ చర్చ మొదలైంది. అయితే ఈ ప్రాజెక్ట్‌పై ఇప్పటివరకు ఎలాంటి అధికారిక ప్రకటన వెలువడలేదు. దీంతో ఈ కాంబినేషన్‌ నిజంగా సెట్స్‌పైకి వస్తుందా అన్నది తెలియాలంటే మరికొంత కాలం వేచి చూడాల్సిందే.