సల్మాన్ కొత్త సినిమా ట్రైలర్‌పై భారీ అంచనాలు

ఎప్పటినుంచో ఆలస్యమవుతున్న మెగాస్టార్ సల్మాన్ ఖాన్ వార్ యాక్షన్ డ్రామా ‘మాతృభూమి’ త్వరలో ప్రేక్షకుల ముందుకు వచ్చే దిశగా అడుగులు వేస్తున్నట్లు తెలుస్తోంది. వెరైటీ ఇండియా ప్రత్యేక కథనం ప్రకారం, ఈ సినిమా ట్రైలర్‌ను ఈ శుక్రవారం విడుదల చేయనున్నారు. పండుగ సందడి కొనసాగుతున్న నేపథ్యంలో ప్రేక్షకుల దృష్టిని ఆకర్షించేందుకు ముంబైలో భారీ స్థాయిలో ట్రైలర్ లాంచ్ ఈవెంట్ నిర్వహించాలని చిత్ర బృందం ప్లాన్ చేస్తున్నట్లు సమాచారం. ప్రస్తుతం ఈ సినిమాపై పెద్దగా బజ్ లేకపోవడంతో, ట్రైలర్ విడుదలతో ప్రచారానికి ఊపొస్తుందా అన్నది ఆసక్తికరంగా మారింది.

ఈ చిత్రానికి మొదట ‘బ్యాటిల్ ఆఫ్ గాల్వాన్’ అనే టైటిల్ పెట్టారు. అయితే భారత్, చైనా మధ్య సంబంధాలు మెరుగుపడిన నేపథ్యంలో, సినిమాలోని కొన్ని అంశాలపై ప్రభుత్వం అభ్యంతరాలు వ్యక్తం చేయడంతో కథలో గణనీయమైన మార్పులు చేసినట్లు వార్తలు వచ్చాయి. ట్రైలర్‌కు సెన్సార్ బోర్డు సర్టిఫికేషన్ లభించిందని, ఇది నాలుగున్నర నిమిషాల నిడివితో ఉండనుందని సమాచారం. భారతీయ సినిమాల్లో అత్యంత సుదీర్ఘమైన ట్రైలర్లలో ఒకటిగా ఇది నిలవనుంది. ఇందులో సల్మాన్ ఖాన్ కల్నల్ సంతోష్ స్ఫూర్తితో రూపొందించిన భారత సైనిక అధికారి పాత్రలో నటిస్తుండగా, చిత్రాంగద సింగ్ కథానాయికగా కనిపించనున్నారు. అపూర్వ లఖియా దర్శకత్వం వహిస్తున్న ఈ చిత్రాన్ని సల్మాన్ ఖాన్ ఫిల్మ్స్ నిర్మిస్తోంది.