మెగాస్టార్ చిరంజీవి కొత్త ప్రాజెక్ట్... డైరెక్టర్ ఎవరంటే!

మెగాస్టార్ చిరంజీవి ఇటీవల ‘మన శంకర వరప్రసాద్ గారు’ సినిమాతో మంచి విజయాన్ని అందుకున్నారు. ఇప్పుడు ఆయన తదుపరి సినిమా దర్శకుడు బాబీతో చేయబోతున్న విషయం తెలిసిందే. వీరిద్దరి కాంబినేషన్‌లో వచ్చిన 'వాల్తేరు వీరయ్య' భారీ కమర్షియల్ హిట్ అయ్యింది. అందుకే ఈ కొత్త సినిమాపై ప్రేక్షకుల్లో పెద్ద స్థాయిలో అంచనాలు ఉన్నాయి. అయితే ఈ సినిమా షూటింగ్ జనవరి చివర్లో మొదలవ్వాల్సి ఉండగా, నిర్మాతకు వచ్చిన కొన్ని ఇబ్బందుల వల్ల అది ఇంకా ప్రారంభం కాలేదు.

ఈ గ్యాప్‌లో మెగాస్టార్ మరో ఆసక్తికరమైన ప్రాజెక్ట్‌ను లైన్‌లో పెట్టినట్లు టాక్ వినిపిస్తోంది. దర్శకుడు సుకుమార్ వద్ద చాలా కాలం పాటు అసిస్టెంట్ డైరెక్టర్‌గా పనిచేసిన శ్రీనివాస్‌కు దర్శకత్వం చేసే అవకాశం ఇచ్చినట్లు సమాచారం. ఇటీవల శ్రీనివాస్ కథను చిరంజీవికి వినిపించగా, ఆ స్టోరీ లైన్ ఆయనకు నచ్చడంతో వెంటనే గ్రీన్ సిగ్నల్ ఇచ్చారట. ఈ సినిమా పల్లెటూరు బ్యాక్‌డ్రాప్‌లో తెరకెక్కబోతుందని చెబుతున్నారు. బాబీ సినిమా ఆలస్యం అయితే, ముందుగా ఈ సినిమానే ప్రారంభించే అవకాశం ఉందని సినీ వర్గాలు చెబుతున్నాయి.

సుకుమార్ స్కూల్ నుండి వచ్చిన దర్శకులు ఇండస్ట్రీలో మంచి స్థాయికి ఎదిగారు. ఉదాహరణకు బుచ్చి బాబు , శ్రీకాంత్ ఓదెల వంటి వారు ప్రస్తుతం మంచి గుర్తింపు పొందారు. ఇప్పుడు శ్రీనివాస్ కూడా అదే దారిలో ఎదగవచ్చని భావిస్తున్నారు. అంతేకాకుండా చిరంజీవి, బాబీ సినిమా తర్వాత శ్రీకాంత్ ఓదెలతో కూడా ఒక సినిమా చేయడానికి ఇప్పటికే ఒప్పుకున్నాడు. ఆ తరువాత శ్రీనివాస్‌తో మరో సినిమా ప్రారంభించే అవకాశాలు ఉన్నట్లు సమాచారం.