కొత్త డైరెక్టర్ కు ఛాన్స్ ఇచ్చిన కిరణ్?

యువ కథానాయకుడు కిరణ్ అబ్బవరం మరోసారి కొత్త ప్రతిభను ప్రోత్సహించే దిశగా అడుగులు వేస్తున్నారు. గతంలో కొత్త నటీనటులు, సాంకేతిక నిపుణులకు అవకాశం కల్పిస్తూ ఓ చిత్రాన్ని నిర్మించిన ఆయన.. ఇప్పుడు పౌర్ణమి ఎంటర్‌టైన్‌మెంట్స్, కే ప్రొడక్షన్స్ బ్యానర్లపై మరో కొత్త చిత్రాన్ని సమర్పించనున్నట్లు తెలుస్తోంది. సస్పెన్స్ థ్రిల్లర్ కథాంశంతో తెరకెక్కనున్న ఈ సినిమాలోనూ పూర్తిగా కొత్త ప్రతిభకు అవకాశాలు కల్పించనున్నట్లు సమాచారం.

ఈ చిత్రానికి సంబంధించిన ఫస్ట్ లుక్‌ను పరిశీలిస్తే.. మిస్టరీని తలపించే ఓ భయానక ఆకారాన్ని ఆసక్తికరంగా చూపించారు. “మీరు ఎప్పుడూ చూడని కథ.. మీరు ఎప్పుడూ ఊహించని జానర్” అనే క్యాప్షన్ సినిమాపై ఆసక్తిని పెంచుతోంది. అనుష్ గోరక్ ఈ చిత్రానికి కథ, స్క్రీన్‌ప్లే, దర్శకత్వం వహిస్తున్నారు. శివ శంకర నాయుడు వై, కిరణ్ అబ్బవరం నిర్మాతలుగా వ్యవహరిస్తున్నారు. సినిమా కథ, నటీనటులు, సాంకేతిక బృందం తదితర పూర్తి వివరాలను త్వరలో అధికారికంగా ప్రకటించే అవకాశం ఉంది.