దుల్కర్‌ సినిమా వాయిదా.. కొత్త రిలీజ్‌ డేట్‌ ఎప్పుడంటే?

మలయాళ స్టార్ దుల్కర్ సల్మాన్ ప్రధాన పాత్రలో నటిస్తున్న యాక్షన్ థ్రిల్లర్ ‘ఐయామ్ గేమ్’పై ఆసక్తి పెరుగుతోంది. ‘ఆర్‌డీఎక్స్’ ఫేమ్ నహాస్ హిదాయత్ దర్శకత్వం వహిస్తున్న ఈ చిత్రంలో కాయదు లోహర్ కథానాయికగా నటిస్తుండగా, ఆంటోనీ వర్గీస్, మిస్కిన్, కతిర్, సంయుక్త విశ్వనాథన్ కీలక పాత్రల్లో కనిపించనున్నారు. ఇప్పటికే విడుదలైన టీజర్, పోస్టర్లు, పాటలకు మంచి స్పందన లభించింది. ముందుగా ప్రకటించిన ప్రకారం ఈ సినిమా ఆగస్టు 20న ఓణం సందర్భంగా విడుదల కావాల్సి ఉంది. అయితే తాజా సమాచారం ప్రకారం సినిమా విడుదల వాయిదా పడే అవకాశం ఉందనే ప్రచారం జరుగుతోంది. పోస్ట్‌ ప్రొడక్షన్ పనులు అనుకున్న సమయానికి పూర్తికాకపోవడమే ఇందుకు కారణమని తెలుస్తోంది.

మరోవైపు అదే సమయంలో పలు భారీ చిత్రాలు విడుదలకు సిద్ధమవుతుండటంతో బాక్సాఫీస్ పోటీ కూడా వాయిదాకు మరో కారణంగా మారినట్లు సినీ వర్గాల్లో చర్చ జరుగుతోంది. పృథ్వీరాజ్ సుకుమారన్ ‘ఖలీఫా’, మమితా బైజు ‘బెత్లెహెం కుటుంబ యూనిట్’ చిత్రాలతో పాటు వారం వ్యవధిలో యష్ ‘టాక్సిక్’ వంటి భారీ చిత్రం రానుంది. దీంతో థియేటర్ల లభ్యత, సోలో రిలీజ్ అవకాశాలను దృష్టిలో ఉంచుకుని చిత్రబృందం కొత్త విడుదల తేదీని పరిశీలిస్తున్నట్లు సమాచారం. ముందుగా పోస్ట్‌ ప్రొడక్షన్ పనులు పూర్తి చేసి, ఆ తర్వాత భారీగా ప్రమోషన్లు నిర్వహించి సినిమాను విడుదల చేయాలని భావిస్తున్నట్లు తెలుస్తోంది. అయితే విడుదల వాయిదా వార్తలపై అధికారిక ప్రకటన రావాల్సి ఉంది.