డ్రాగన్‌కి డబుల్ డోస్? ఎన్టీఆర్ సినిమా రెండు పార్ట్స్‌గా మారబోతుందా?

జూనియర్ ఎన్టీఆర్ – ప్రశాంత్ నీల్ కాంబినేషన్‌లో తెరకెక్కుతున్న సినిమా “డ్రాగన్” గురించిన వార్తలు మళ్లీ హాట్ టాపిక్‌గా మారాయి. ఈ కాంబినేషన్ 2020లోనే ప్రకటించబడింది కానీ పలు కారణాల వల్ల షూటింగ్ చాలా సార్లు వాయిదా పడింది. చివరికి ఈ ఏడాది సినిమా సెట్స్‌ మీదకు వెళ్లింది. తాజా సమాచారం ప్రకారం, టీమ్ ఇప్పటికే షూట్ చేసిన కొన్ని పార్ట్స్‌ని స్క్రాప్ చేసి, కొత్త మార్పులతో మళ్లీ ప్రారంభించాలనుకుంటున్నారని తెలుస్తోంది. కొత్త షెడ్యూల్ నవంబర్‌లో మొదలయ్యే అవకాశం ఉందట. అంతేకాదు, ఇప్పుడు మరో ఆసక్తికరమైన టాక్ వినిపిస్తోంది ఈ సినిమాను రెండు భాగాలుగా చేయాలనే ఆలోచనలో ఉన్నారట మేకర్స్. కారణం ఏమిటంటే, కథ చాలా పెద్దదిగా మరియు విశాలమైన స్కేల్లో ఉండటంతో ఒకే సినిమాలో పూర్తిగా చూపించడం కష్టమని అంటున్నారు.

ప్రాజెక్ట్‌కు దగ్గరగా ఉన్న ఒక వర్గం చెబుతున్నదాని ప్రకారం, ఈ ఐడియాపై చర్చలు జరుగుతున్నాయే కానీ ఇంకా ఫైనల్ నిర్ణయం తీసుకోలేదు. అయినప్పటికీ, రెండు భాగాలుగా తీసే ఆలోచన స్పష్టంగా పరిశీలనలో ఉందట. ఇది ప్రశాంత్ నీల్‌కి కొత్త విషయం కాదు. ఆయన చేసిన KGF మరియు సలార్ కూడా మొదట ఒకే సినిమాగా ప్లాన్ చేసి తర్వాత రెండు పార్ట్స్‌గా విభజించారు. అయితే ఈసారి మాత్రం డ్రాగన్ను కొంచెం భిన్నంగా తెరకెక్కించాలనే ఆలోచనలో ఉన్నారని టాక్. అంటే రెండు భాగాలను ఒకేసారి షూట్ చేసి, కొద్ది గ్యాప్‌లోనే రిలీజ్ చేయాలని ప్లాన్ చేస్తున్నారట KGF, సలార్‌లా ఏళ్ల తేడా ఉండదట. అయితే, భారతీయ సినీ పరిశ్రమలో ఇలా తక్కువ గ్యాప్‌లో రెండు పార్ట్స్ రిలీజ్ చేయడం చాలా అరుదు. సాధారణంగా మొదటి భాగం ఆడియెన్స్‌తో కనెక్ట్ అవ్వడానికి కొంత సమయం పడుతుంది. అందుకే సీక్వెల్‌లు సాధారణంగా గ్యాప్‌తో వస్తాయి.

ఇప్పుడు డ్రాగన్ మేకర్స్ ఈ సవాలును ఎలా హ్యాండిల్ చేస్తారో చూడాలి. ఈ సినిమాలో జూనియర్ ఎన్టీఆర్ హీరోగా, రుక్మిణి వసంత్ హీరోయిన్‌గా నటిస్తున్నారు. దర్శకుడు ప్రశాంత్ నీల్, నిర్మాతలు మైత్రీ మూవీ మేకర్స్, సంగీతం రవి బస్రూర్ అందిస్తున్నారు. రెండు పార్ట్స్ ప్లాన్‌పై అధికారిక ప్రకటన మాత్రం మేకర్స్ ఫైనల్ డెసిషన్ తీసుకున్న తర్వాత రానుంది.