కెరీర్ ప్రారంభ కష్టాలను గుర్తుచేసుకున్న విజయ్ వర్మ

నటుడిగా వరుస అవకాశాలతో దూసుకెళ్తున్న విజయ్ వర్మ తన కెరీర్ ప్రారంభ దశలో ఎదుర్కొన్న కష్టాలను తాజాగా వెల్లడించారు. సినీ రంగంలోకి అడుగుపెట్టే సమయంలో ఎన్నో సవాళ్లు ఎదురయ్యాయని తెలిపారు. హైదరాబాద్‌లో ఉన్నప్పుడు నటనతో పాటు మోడలింగ్ అవకాశాల కోసం ప్రయత్నించిన సమయంలో ఓ చేదు అనుభవం ఎదురైందని చెప్పారు. ఓ మోడల్ కోఆర్డినేటర్ తనతో అసభ్యంగా ప్రవర్తించడంతో ఒక్కసారిగా షాక్‌కు గురయ్యానని, అయితే ధైర్యంగా అతడిని ప్రశ్నించడంతో వెనక్కి తగ్గాడని వివరించారు.

కొత్తగా ఏ రంగంలోకి వచ్చిన వారికి ఇలాంటి అనుభవాలు ఎదురైతే చాలామంది భయపడి వెనక్కి తగ్గుతారని విజయ్ వర్మ అన్నారు. కానీ తాను నటుడిగా ఎదగాలనే లక్ష్యాన్ని వదులుకోకుండా పట్టుదలతో ప్రయత్నాలు కొనసాగించానని తెలిపారు. హైదరాబాద్‌లోని సూత్రధార్ స్కూల్ ఆఫ్ యాక్టింగ్‌లో చేరేందుకు ప్రయత్నించినప్పుడు మొదట తిరస్కరణ ఎదురైనా, నిరాశ చెందకుండా కష్టపడి ఈ స్థాయికి చేరుకున్నానని చెప్పారు.