తండ్రి వృత్తినే కెరీర్‌గా మార్చుకున్న యువతి

మనసుకు నచ్చిన దారిలో ప్రయాణించేందుకు చాలామంది సందేహిస్తుంటారు. కానీ హిమాచల్ ప్రదేశ్‌కు చెందిన నేహా ఠాకూర్ మాత్రం చిన్ననాటి కలను సాకారం చేసుకుంటూ తనకు నచ్చిన వృత్తిలో కొనసాగుతోంది. మండీ జిల్లాకు చెందిన నేహా తండ్రి ట్రక్ డ్రైవర్. చిన్నతనంలో తండ్రి నడిపే భారీ ట్రక్‌ను చూసి ఆకర్షితురాలైన ఆమెకు అప్పుడే ట్రక్ డ్రైవింగ్‌పై ఆసక్తి ఏర్పడింది. తండ్రే స్వయంగా ట్రక్‌లో ఆమెను స్కూల్‌కు తీసుకెళ్లడంతో ఆ మక్కువ మరింత పెరిగింది. పెద్దయ్యాక తొలుత ఆమె ఈ వృత్తిని ఎంచుకోవడంపై తండ్రి సందేహించినప్పటికీ, తన కుమార్తె సంతోషాన్ని చూసిన తర్వాత అంగీకరించారు.

తన చిన్ననాటి కలను నిజం చేసుకున్న నేహా ఇప్పుడు ట్రక్ డ్రైవర్‌గా పనిచేస్తూ, తన అనుభవాలను సామాజిక మాధ్యమాల్లో చిన్న వీడియోల రూపంలో పంచుకుంటోంది. ట్రక్ ప్రయాణంలో కనిపించే పర్వతాలు, ప్రకృతి అందాలను చూపిస్తూ, ట్రక్ డ్రైవర్ల రోజువారీ జీవితం ఎలా ఉంటుందో వివరిస్తోంది. ఎక్కువసేపు డ్రైవింగ్ చేయడం వల్ల ఎదురయ్యే ఇబ్బందులను కూడా ఆమె వీడియోల్లో చెబుతోంది. ఇటీవల ఆమె చేసిన ఓ వీడియోకు కోట్ల కొద్దీ వీక్షణలు రావడంతో నేహా సామాజిక మాధ్యమాల్లో వైరల్‌గా మారింది. తనకు నచ్చిన పనిని చేస్తూ జీవితాన్ని ఆస్వాదిస్తున్న ఆమెను నెటిజన్లు అభినందిస్తున్నారు.