విశాఖ అర్బన్ అభివృద్ధికి కేంద్రం ఆమోదం

భారత ప్రభుత్వం అమలు చేస్తున్న అర్బన్ చాలెంజ్ ఫండ్ పథకం కింద జివిఎంసి ప్రతిపాదించిన మూడు కీలక మౌలిక సదుపాయాల ప్రాజెక్టులకు నేషనల్ అపెక్స్ కమిటీ ఆమోదం తెలిపింది. మొత్తం ₹1,501.03 కోట్ల అంచనా వ్యయంతో ఈ ప్రాజెక్టులు విశాఖపట్నం అభివృద్ధికి కొత్త ఊపునివ్వనున్నాయి.

ఆమోదం పొందిన ప్రాజెక్టుల్లో మధురవాడ జోన్‌లో అండర్‌గ్రౌండ్ డ్రైనేజ్ వ్యవస్థ అభివృద్ధికి ₹658.61 కోట్లు, 24 గంటల స్మార్ట్ తాగునీటి సరఫరా వ్యవస్థ ఏర్పాటు కోసం ₹725.18 కోట్లు, బల్క్ మరియు సెమీ బల్క్ నీటి సరఫరా వ్యవస్థ పునరుద్ధరణ, ఆధునీకరణకు ₹117.24 కోట్లు కేటాయించారు.

ఈ మూడు ప్రాజెక్టులు విశాఖపట్నం పట్టణ మౌలిక సదుపాయాలను మరింత బలోపేతం చేయడంతో పాటు ప్రజల జీవన ప్రమాణాలను మెరుగుపరచనున్నాయి. నగర అభివృద్ధికి సహకారం అందించిన ప్రధాన మంత్రి నరేంద్ర మోదీ మరియు కేంద్ర మంత్రి మనోహర్ లాల్ ఖట్టర్‌లకు రాష్ట్ర నాయకత్వం కృతజ్ఞతలు తెలిపింది. ముఖ్యమంత్రి నారా చంద్రబాబు నాయుడు నాయకత్వంలో విశాఖపట్నం ఆధునిక నగరంగా ముందుకు సాగుతోంది.