వరలక్ష్మీ వ్రతం 2026: ఎవరు ఆచరించాలి? పూజా విధానం, కలశంపై పూర్తి వివరాలు

శ్రావణ మాసం అంటేనే పూజలు, వ్రతాలకు ప్రత్యేక ప్రాధాన్యం ఉంటుంది. ఈ మాసంలో మహిళలు కుటుంబ సుఖసంతోషాలు, ఐశ్వర్యం, ఆయురారోగ్యాల కోసం ప్రత్యేక పూజలు నిర్వహిస్తుంటారు. అందులో వరలక్ష్మీ వ్రతానికి ఎంతో ప్రాముఖ్యత ఉంది. ఈ సందర్భంగా లక్ష్మీదేవిని అలంకరించి, ప్రత్యేక నైవేద్యాలు సమర్పించి భక్తిశ్రద్ధలతో పూజిస్తారు.

వరలక్ష్మీ వ్రతాన్ని ఎవరు ఆచరించవచ్చు అనే విషయంపై ఆధ్యాత్మిక ప్రవచనకర్త ఆచార్య కాకునూరి సూర్యనారాయణమూర్తి వివరణ ఇచ్చారు. ఆయన ప్రకారం ఎవరైనా వరలక్ష్మీ వ్రతాన్ని ఆచరించవచ్చు. పురోహితుడి సూచనలతో వ్రతాన్ని నిర్వహించుకోవచ్చు. కుటుంబంలో ఇంతకుముందు ఈ వ్రతాన్ని ఆచరించే సంప్రదాయం లేకపోయినా ఆసక్తి ఉన్నవారు, వ్రతం చేసే వారి దగ్గర విధానాన్ని తెలుసుకుని ప్రారంభించవచ్చని తెలిపారు. ఒకసారి ప్రారంభించిన తర్వాత వీలైనంత కాలం సంప్రదాయాన్ని కొనసాగించడం మంచిదని సూచించారు.

వరలక్ష్మీ వ్రతంలో కలశానికి ప్రత్యేక ప్రాధాన్యం ఉందని ఆయన తెలిపారు. ఇంట్లో అనుకూలమైన ప్రదేశంలో మంటపాన్ని ఏర్పాటు చేసి, దానిపై కలశాన్ని ఉంచి నీటితో నింపి, మామిడాకులు, కొబ్బరికాయతో అలంకరించాలి. అనంతరం కలశంలో వరలక్ష్మీదేవిని ఆవాహన చేసి పూజించాలి. కొందరు తమ సంప్రదాయం, సౌకర్యాన్ని బట్టి అమ్మవారి ఫొటో లేదా బంగారం, వెండి, రాగి, ఇత్తడి వంటి లోహాలతో తయారు చేసిన ప్రతిమను కూడా ఏర్పాటు చేసుకుంటారు.

అమ్మవారి చిత్రపటం విషయంలోనూ భక్తులకు సందేహాలు ఉంటాయి. చారుమతి దేవికి లక్ష్మీదేవి నిల్చుని దర్శనమిచ్చిందనే సంప్రదాయం ఉన్నందున నిల్చున్న అమ్మవారి చిత్రాన్ని పూజలో ఏర్పాటు చేసుకోవచ్చని ఆధ్యాత్మికవేత్త చెబుతున్నారు. అదే సమయంలో కూర్చున్న లక్ష్మీదేవి చిత్రాన్ని కూడా పూజించవచ్చని తెలిపారు. ముఖ్యంగా కమలంపై కూర్చున్న అమ్మవారి చిత్రాన్ని ఎంచుకోవడం మంచిదని సూచించారు.

శ్రావణ మాసంలో సాధారణంగా పౌర్ణమికి ముందు వచ్చే శుక్రవారం వరలక్ష్మీ వ్రతాన్ని ఆచరిస్తారు. అయితే ఆ రోజున వీలు కాకపోతే శ్రావణ శుక్లపక్షంలోని మరో శుక్రవారం కూడా వ్రతాన్ని ఆచరించవచ్చని సూర్యనారాయణమూర్తి తెలిపారు. ఏ శుక్రవారం కూడా సాధ్యం కాకపోతే దసరా నవరాత్రుల్లో లక్ష్మీ అలంకారం చేసే రోజున వ్రతాన్ని పూర్తి చేయవచ్చని సూచించారు. వ్రతానికి ఏర్పాట్లు పూర్తయిన తర్వాత అనుకోని ఇబ్బంది ఎదురైతే ఇంట్లోని మరో మహిళ వ్రతాన్ని పూర్తి చేయవచ్చని, అది కూడా సాధ్యం కాకపోతే పురోహితుడి ద్వారా నిర్వహించవచ్చని తెలిపారు.

గమనిక:

పైన తెలిపిన వివరాలు ఆధ్యాత్మిక ప్రవచనకర్తలు, నిపుణులు మరియు వివిధ శాస్త్రాల్లో పేర్కొన్న అంశాల ఆధారంగా అందించినవి మాత్రమే. వీటిలోని అన్ని అంశాలకు ఆధునిక శాస్త్రీయ ఆధారాలు ఉండకపోవచ్చు. కాబట్టి ఈ సమాచారాన్ని విశ్వాసం మరియు సంప్రదాయానికి సంబంధించిన విషయంగా మాత్రమే పరిగణించాలి. దీన్ని ఎంతవరకు విశ్వసించాలనేది పూర్తిగా వ్యక్తిగత నిర్ణయం.