విదేశీ పట్టాలపై వందే భారత్‌ రైళ్లు..

భారతీయ రైల్వే రంగం మరో కీలక ముందడుగు వేసేందుకు సిద్ధమవుతోంది. దేశీయంగా తయారవుతున్న సెమీ హైస్పీడ్‌ వందే భారత్‌ రైళ్లను అంతర్జాతీయ మార్కెట్లకు ఎగుమతి చేయాలని కేంద్ర ప్రభుత్వం ప్రణాళికలు రూపొందిస్తోంది. రాబోయే మూడు నుంచి నాలుగేళ్లలో వందే భారత్‌ రైళ్ల ఎగుమతులను ప్రారంభించడమే లక్ష్యమని కేంద్ర రైల్వే మంత్రి అశ్విని వైష్ణవ్‌ వెల్లడించారు. దేశవ్యాప్తంగా కీలక మార్గాల్లో ఈ రైళ్ల సేవలను విస్తరించడంతో పాటు అత్యాధునిక వందే భారత్‌ స్లీపర్‌ రైళ్లను ప్రవేశపెట్టే ప్రయత్నాలు జరుగుతున్న నేపథ్యంలో ఈ ప్రకటన ప్రాధాన్యం సంతరించుకుంది.

స్వదేశీ సాంకేతిక పరిజ్ఞానంతో రూపొందుతున్న వందే భారత్‌ రైళ్లు ఆధునిక సౌకర్యాలు, వేగం, ప్రయాణికుల భద్రతకు ప్రాధాన్యం ఇస్తున్నాయి. వీటిని దేశీయ అవసరాలకే పరిమితం చేయకుండా అంతర్జాతీయ ప్రమాణాలకు అనుగుణంగా అభివృద్ధి చేసి విదేశీ మార్కెట్లలోకి తీసుకెళ్లాలని ప్రభుత్వం భావిస్తోంది. రైల్వే మౌలిక వసతులపై పెట్టుబడులు, దేశీయ తయారీకి ప్రోత్సాహం ఈ లక్ష్యానికి దోహదం చేస్తున్నాయి. ఎగుమతులు ప్రణాళిక ప్రకారం ప్రారంభమైతే ఆధునిక రైల్వే సాంకేతికతను అందించే దేశంగా భారత్‌ అంతర్జాతీయ మార్కెట్లో తన స్థానాన్ని మరింత బలోపేతం చేసుకునే అవకాశం ఉంది.