తెలంగాణను గుడిసెలు లేని రాష్ట్రంగా తీర్చిదిద్దుతాం - పొంగులేటి

ఇందిరమ్మ ఇళ్ల పథకం ద్వారా తెలంగాణను గుడిసెలు లేని రాష్ట్రంగా తీర్చిదిద్దడమే ప్రభుత్వ లక్ష్యమని రాష్ట్ర గృహ నిర్మాణ, రెవెన్యూ శాఖ మంత్రి పొంగులేటి శ్రీనివాసరెడ్డి తెలిపారు. జనగామలో శనివారం ఇందిరమ్మ ఇళ్ల గృహప్రవేశాలు, మంజూరు పత్రాల పంపిణీ కార్యక్రమాల్లో పాల్గొన్న ఆయన.. రూ.45 కోట్ల విలువైన వివిధ అభివృద్ధి పనులకు శంకుస్థాపనలు, ప్రారంభోత్సవాలు చేశారు. ఈ సందర్భంగా మాట్లాడుతూ పేదల సొంతింటి కలను నెరవేర్చేందుకు ప్రభుత్వం ఇందిరమ్మ ఇళ్ల పథకాన్ని అమలు చేస్తోందన్నారు. తొలి దశలో 4.50 లక్షల ఇళ్లు మంజూరు చేశామని, దసరా నాటికి 2.18 లక్షల ఇళ్లు పూర్తయ్యేలా చర్యలు తీసుకుంటున్నామని చెప్పారు.

కేంద్రం నుంచి నిధుల కోసం ఎదురుచూడకుండా రాష్ట్ర ప్రభుత్వం ఇళ్ల నిర్మాణాన్ని ముందుకు తీసుకెళ్తోందని మంత్రి తెలిపారు. రెండో దశలోనూ పెద్ద సంఖ్యలో ఇళ్లను కేటాయించి అర్హులైన పేదలకు ప్రయోజనం కల్పిస్తామని చెప్పారు. గతంలో ఇళ్ల స్థలాల కోసం సేకరించిన భూమిలో పంపిణీ కాని ప్లాట్లను అర్హులకు అందించడంతోపాటు, వాటిపై ఇళ్ల నిర్మాణానికి ఆర్థిక సాయం అందిస్తామని వెల్లడించారు. రాజకీయాలకు అతీతంగా అర్హులైన ప్రతి కుటుంబానికి పథకం అమలు చేస్తామని స్పష్టం చేశారు.