ఓయూ మూల్యాంకనంపై విద్యార్థుల అనుమానాలు

ఉస్మానియా విశ్వవిద్యాలయంలో ఇటీవల విడుదలైన ఎల్‌ఎల్‌బీ సెమిస్టర్ పరీక్ష ఫలితాలపై విద్యార్థులు తీవ్ర అసంతృప్తి వ్యక్తం చేస్తున్నారు. విద్యార్థుల వివరాల ప్రకారం, సుమారు 1,500 మంది విద్యార్థులు మొదట ఫెయిల్ అయినట్లు ప్రకటించారు. గత సెమిస్టర్లలో మంచి మార్కులు సాధించిన విద్యార్థులు కూడా ఫెయిల్ జాబితాలో ఉండటంతో అనుమానాలు వ్యక్తమయ్యాయి.

దీంతో పలువురు విద్యార్థులు ఒక్కో పత్రానికి రూ.700 చెల్లించి పునర్మూల్యాంకనానికి దరఖాస్తు చేసుకున్నారు. పునర్మూల్యాంకనం అనంతరం దాదాపు 1,000 మంది విద్యార్థులు ఉత్తీర్ణులు కావడం చర్చనీయాంశమైంది. అంతేకాకుండా మొదట ఫెయిల్‌గా ప్రకటించిన ఎనిమిది మంది విద్యార్థులు పునర్మూల్యాంకనం తర్వాత ప్రథమ శ్రేణి మార్కులు సాధించడం మూల్యాంకన విధానంపై ప్రశ్నలు లేవనెత్తుతోంది.

ఈ వ్యవహారంపై స్వతంత్ర విచారణ జరపాలని విద్యార్థి సంఘాలు డిమాండ్ చేస్తున్నాయి. మొదటి మూల్యాంకనంలో తప్పిదాలు జరిగాయా అనే అనుమానాలు వ్యక్తం చేస్తున్న విద్యార్థులు, ఫిబ్రవరిలో నిర్వహించిన పరీక్షల ఫలితాలు ఏప్రిల్‌లో రావడం, జర్నలిజం సెమిస్టర్ ఫలితాలు ఇంకా వెలువడకపోవడం పట్ల కూడా ఆందోళన వ్యక్తం చేస్తున్నారు. మూల్యాంకన విధానాన్ని పూర్తిగా సమీక్షించి, తప్పిదాలు ఉంటే బాధ్యులపై చర్యలు తీసుకోవాలని వారు కోరుతున్నారు.