లాకప్ డెత్ కేసులో వేగవంతమైన సిట్ దర్యాప్తు

విజయవాడ లాకప్ డెత్ కేసు దర్యాప్తును ప్రత్యేక దర్యాప్తు బృందం (సిట్) మరింత వేగవంతం చేసింది. ఈ కేసులో సీఐ నాగరాజుకు సహకరించినట్లు అనుమానిస్తున్న ఇద్దరు హెడ్ కానిస్టేబుళ్లు అశోక్, నాని కోసం సిట్ పోలీసులు గాలింపు చేపట్టారు. కొద్ది రోజులుగా సెలవుల్లో ఉన్న ఈ ఇద్దరి ఆచూకీ కోసం వారి మొబైల్ ఫోన్ సిగ్నళ్లను కూడా సిట్ అధికారులు ట్రాక్ చేస్తున్నారు.

మరోవైపు, సాయికృష్ణ తల్లి ఇచ్చిన సమాచారం ఆధారంగా సీఐ నాగరాజుతో పాటు మరికొందరు పోలీసు సిబ్బంది పాత్ర కూడా ఉండొచ్చనే కోణంలో దర్యాప్తు కొనసాగుతోంది. ఈ నేపథ్యంలో హెడ్ కానిస్టేబుల్ అశోక్ ఇంటికి వెళ్లిన సిట్ అధికారులు, ఆయన అక్కడ లేకపోవడంతో వెనుదిరిగారు. ప్రస్తుతం అజ్ఞాతంలో ఉన్న ఇద్దరు హెడ్ కానిస్టేబుళ్ల ఆచూకీ కోసం సిట్ విస్తృతంగా గాలింపు కొనసాగిస్తోంది.