వేగ పరిమితి పెరిగిన తర్వాత ఓఆర్‌ఆర్‌పై ప్రమాదాలు పెరిగాయా?

హైదరాబాద్‌ ఔటర్‌ రింగ్‌రోడ్డు (ఓఆర్‌ఆర్‌)పై అతివేగం, ట్రాఫిక్‌ నిబంధనల ఉల్లంఘనల కారణంగా ప్రమాదాలు పెరుగుతున్నాయన్న ఆందోళన వ్యక్తమవుతోంది. ఈ నేపథ్యంలో గరిష్ఠ వేగ పరిమితిని గంటకు 120 కి.మీ. నుంచి 100 కి.మీ.కు తగ్గించాలని కోరుతూ హైదరాబాద్‌ పోలీసు కమిషనర్‌ వీసీ సజ్జనర్‌ రవాణాశాఖ కమిషనర్‌ ఇలంబర్తికి లేఖ రాశారు. ఇదే అంశంపై ఇలంబర్తి అక్టోబరు 9న హైదరాబాద్‌ గ్రోత్‌ కారిడార్‌ లిమిటెడ్‌ (హెచ్‌జీసీఎల్‌)కు లేఖ పంపారు. 2023 జులైలో శాస్త్రీయ అధ్యయనం లేకుండానే వేగ పరిమితిని పెంచారని అధికారులు పేర్కొన్నారు. 2023 జులై 27 వరకు ఓఆర్‌ఆర్‌పై గరిష్ఠ వేగ పరిమితి 100 కి.మీ.గా ఉండగా, జులై 28 నుంచి 120 కి.మీ.కు పెంచారు. ఈ అంశంపై సెప్టెంబరు 18న సచివాలయంలోనూ విస్తృతంగా చర్చించారు.

ఓఆర్‌ఆర్‌పై ద్విచక్రవాహనాల ప్రవేశం, ఇతర వాహనాలను అధిగమించే సమయంలో జిగ్‌జాగ్‌ డ్రైవింగ్‌, నెమ్మదిగా వెళ్లే వాటర్‌ ట్యాంకర్లతో డివైడర్‌పై మొక్కలకు నీరు పోయడం, వాహనాలను ఆకస్మికంగా నిలపడం వంటి ఉల్లంఘనలు ప్రమాదాలకు కారణమవుతున్నాయని సంయుక్త తనిఖీల్లో గుర్తించినట్లు అధికారులు తెలిపారు. మరోవైపు, ఓఆర్‌ఆర్‌పై పెట్రోలింగ్‌ వాహనాల సంఖ్య గతంలో 19 ఉండగా ప్రస్తుతం ఏడు నుంచి ఎనిమిదికి తగ్గిందని, కనీసం 30 వాహనాలు అవసరమని ప్రమాదాల నివారణ కమిటీ అంచనా వేసింది. గరిష్ఠ వేగ పరిమితి 120 కి.మీ.గా ఉన్న 2016, 2017లో వరుసగా 1,545, 1,562 ప్రమాదాలు నమోదయ్యాయి. వేగ పరిమితిని 100 కి.మీ.కు తగ్గించిన తర్వాత 2018లో 618, 2019లో 782, 2020లో 641, 2021లో 840, 2022లో 1,029 ప్రమాదాలు నమోదయ్యాయి. 2023లో వేగ పరిమితిని మళ్లీ 120 కి.మీ.కు పెంచిన తర్వాత ఆ ఏడాది 1,402, 2024లో 1,592 ప్రమాదాలు నమోదైనట్లు గణాంకాలు సూచిస్తున్నాయి. వేగ పరిమితిపై పునఃసమీక్షతో పాటు పెట్రోలింగ్‌, రహదారి భద్రతా చర్యలను బలోపేతం చేయాలని అధికారులు కోరుతున్నారు.