ట్రంప్-హెగ్సెత్ ఘర్షణ వార్తలు.. నిజమేనా?

ఇరాన్‌తో కొనసాగుతున్న ఘర్షణల నేపథ్యంలో అమెరికా క్షిపణి నిల్వలు తగ్గిపోవడంపై అధ్యక్షుడు డొనాల్డ్ ట్రంప్, రక్షణ మంత్రి పీట్ హెగ్సెత్ మధ్య క్యాంప్ డేవిడ్‌లో జరిగిన సమావేశంలో తీవ్ర చర్చ జరిగినట్లు అమెరికా మీడియా కథనం పేర్కొంది. కీలక ఆయుధాల కొరతపై తనకు పూర్తి సమాచారం ఎందుకు అందలేదని ట్రంప్ ప్రశ్నించినట్లు ఆ కథనం వెల్లడించింది. దీనికి రక్షణ శాఖలోని అధికారుల సమాచార లోపమే కారణమని హెగ్సెత్ వివరణ ఇచ్చినట్లు కూడా పేర్కొంది.

అదే కథనం ప్రకారం, ఇరాన్ తక్కువ వ్యయంతో తయారయ్యే డ్రోన్లను భారీగా వినియోగిస్తుండగా, వాటిని ఎదుర్కొనేందుకు అమెరికా పేట్రియట్, థాడ్ వంటి ఖరీదైన ఇంటర్‌సెప్టర్ క్షిపణులను విస్తృతంగా ఉపయోగించాల్సి వచ్చిందని, దీంతో ఆయుధ నిల్వలపై ఒత్తిడి పెరిగిందని తెలిపింది. అయితే ఈ వార్తలను వైట్‌హౌస్ పూర్తిగా ఖండించింది. ఇది "100 శాతం నకిలీ వార్త" అని పేర్కొంటూ, హెగ్సెత్‌పై అధ్యక్షుడు ట్రంప్‌కు పూర్తి విశ్వాసం ఉందని ప్రెస్ సెక్రటరీ కరోలిన్ లీవిట్ స్పష్టం చేశారు. పెంటగాన్ కూడా ఈ కథనాన్ని తోసిపుచ్చింది.