మంత్రి లోకేష్‌ను కలిసిన ప్రముఖ ఆర్చర్‌ జ్యోతి సురేఖ

జపాన్‌లో జరిగిన ఏషియన్ గేమ్స్‌–2026లో భారత్‌కు ప్రాతినిధ్యం వహించి ఆర్చరీ కాంపౌండ్ మహిళల టీమ్‌ విభాగంలో స్వర్ణ పతకం సాధించిన ప్రముఖ ఆర్చర్‌ వెన్నం జ్యోతి సురేఖ సోమవారం మంత్రి నారా లోకేష్‌ను కలిశారు. తన తండ్రి సురేంద్ర కుమార్‌తో కలిసి ఉండవల్లిలోని మంత్రి నివాసానికి వెళ్లిన ఆమె.. లోకేష్‌తో భేటీ అయ్యారు. ఏషియన్ గేమ్స్‌లో ఇప్పటివరకు నాలుగు స్వర్ణ పతకాలతో పాటు మొత్తం ఆరు పతకాలు సాధించిన జ్యోతి సురేఖను మంత్రి అభినందించారు.

అంతర్జాతీయ వేదికపై అద్భుత ప్రతిభ కనబరిచి దేశానికి, రాష్ట్రానికి గర్వకారణంగా నిలిచారని లోకేష్ ప్రశంసించారు. 2028 ఒలింపిక్స్‌లో పతకం సాధించడమే లక్ష్యంగా ముందుకు సాగాలని ఆకాంక్షించారు. ఆమెకు అన్ని విధాలా అండగా ఉంటామని మంత్రి హామీ ఇచ్చారు.