ఈ నెల చివర్లో ఢిల్లీలో వర్షాలు.. ఉత్తరాదికి అలర్ట్‌

ఏడేళ్ల తర్వాత సెప్టెంబర్‌ చివరి రోజుల్లో ఢిల్లీలో వర్షం నమోదైంది. మంగళవారం ఢిల్లీలో 0.6 మిల్లీమీటర్ల వర్షపాతం నమోదైనట్లు వాతావరణ శాఖ వెల్లడించింది. వర్షాల ప్రభావంతో నగరంలో ఉష్ణోగ్రత సాధారణం కంటే 5.1 డిగ్రీల సెల్సియస్‌ తక్కువగా నమోదైంది. ప్రస్తుతం ఆగ్నేయ ఉత్తరప్రదేశ్‌ పరిసరాల్లో అల్పపీడనం కొనసాగుతున్న నేపథ్యంలో ఢిల్లీ సహా ఉత్తర భారతదేశంలోని పలు ప్రాంతాల్లో వర్షాలు కురిసే అవకాశం ఉంది.

ఉత్తరప్రదేశ్‌, ఉత్తరాఖండ్‌లో విస్తారంగా వర్షాలు కురిసే సూచనలు ఉండగా, పంజాబ్‌, హర్యానా, ఢిల్లీ-ఎన్‌సీఆర్‌ ప్రాంతాల్లోనూ వర్షాలు పడే అవకాశం ఉందని వాతావరణ శాఖ అంచనా వేసింది. ఈ నెల 29 తర్వాత ఉత్తరాదిలో వాతావరణ పరిస్థితుల్లో మార్పులు చోటుచేసుకునే అవకాశం ఉందని అధికారులు తెలిపారు. అల్పపీడనం ప్రభావంతో రానున్న రోజుల్లో పలు ప్రాంతాల్లో వర్షాలు కొనసాగవచ్చని పేర్కొన్నారు.