ఆక్వా యూనిట్ల కాలుష్యంపై పవన్‌ కీలక ఆదేశాలు

ఆక్వా ప్రాసెసింగ్‌, ప్రీ-ప్రాసెసింగ్‌ యూనిట్లు పర్యావరణ నిబంధనలను తప్పనిసరిగా పాటించాలని ఏపీ ఉప ముఖ్యమంత్రి, అటవీ, పర్యావరణ శాఖ మంత్రి పవన్‌ కల్యాణ్‌ ఆదేశించారు. శుద్ధి చేయని ఆక్వా వ్యర్థాలతో నదులు, కాలువలు, చెరువులు, సాగర సంగమ ప్రాంతాలు, భూగర్భ జలాలు కలుషితం కాకుండా చర్యలు తీసుకోవాలని సూచించారు. మంగళగిరిలో సీఫుడ్‌ ఎక్స్‌పోర్టర్స్‌ అసోసియేషన్‌ ఆఫ్‌ ఇండియా (సీఈఏఐ) ప్రతినిధులతో నిర్వహించిన సమీక్షలో ఆక్వా యూనిట్ల పర్యావరణ అనుసరణపై చర్చించారు.

రాష్ట్రంలో 119 ఆక్వా ప్రాసెసింగ్‌, 12 ప్రీ-ప్రాసెసింగ్‌ యూనిట్లు ఉన్నాయని అధికారులు తెలిపారు. ఇప్పటివరకు 82 యూనిట్ల నుంచి నమూనాలు సేకరించి పరీక్షించగా, కొన్ని యూనిట్లలో పీహెచ్‌, టోటల్‌ సస్పెండెడ్‌ సాలిడ్స్‌ (టీ‌ఎస్‌ఎస్), బయోకెమికల్‌ ఆక్సిజన్‌ డిమాండ్‌ (బీఓడీ) వంటి ప్రమాణాల్లో వ్యత్యాసాలు గుర్తించినట్లు వెల్లడించారు. నిబంధనలు పాటించని 10 యూనిట్లకు షోకాజ్‌ నోటీసులు జారీ చేసి, దిద్దుబాటు చర్యలకు రెండు వారాల గడువు ఇచ్చారు. కాలుష్యాన్ని మూలం వద్దే నియంత్రించాలని, నిరంతర తనిఖీలు, నమూనాల పరీక్షలు చేపట్టాలని పవన్‌ కల్యాణ్‌ అధికారులను ఆదేశించారు.