తెలంగాణలో పీజీ వైద్య సీట్ల పెంపునకు ఎన్‌ఎంసీ గ్రీన్‌సిగ్నల్‌

తెలంగాణలోని ప్రభుత్వ, ప్రైవేటు వైద్య కళాశాలల్లో పోస్టు గ్రాడ్యుయేట్‌ (పీజీ) వైద్య సీట్ల సంఖ్య పెరిగింది. అదనంగా మంజూరైన సీట్లు ఈ విద్యా సంవత్సరం నుంచే అందుబాటులోకి రానున్నాయి. ప్రభుత్వ వైద్య కళాశాలల్లో 359 పీజీ సీట్లు, నిమ్స్‌లో మరో 8 సీట్లను జాతీయ వైద్య కమిషన్‌ (ఎన్‌ఎంసీ) మంజూరు చేసింది. ఈ మేరకు శుక్రవారం రాష్ట్ర ప్రభుత్వానికి సమాచారం అందించింది. దీంతో ప్రభుత్వ వైద్య కళాశాలల్లో మొత్తం పీజీ సీట్ల సంఖ్య 1,731కి చేరింది. ఈ ఏడాది 26 వైద్య కళాశాలల్లో కొత్తగా 420 పీజీ సీట్ల కోసం రాష్ట్ర ప్రభుత్వం ఎన్‌ఎంసీకి దరఖాస్తు చేయగా, అందులో 359 సీట్లకు అనుమతి లభించింది.

రాష్ట్ర ప్రభుత్వం అవసరమైన మౌలిక సదుపాయాలను కల్పిస్తామని అఫిడవిట్‌ సమర్పిస్తే మిగిలిన 61 సీట్లకు కూడా అనుమతి లభించే అవకాశం ఉందని వైద్యవర్గాలు తెలిపాయి. మరోవైపు, కాళోజీ నారాయణరావు ఆరోగ్య విశ్వవిద్యాలయం పీజీ వైద్య ప్రవేశాల కౌన్సెలింగ్‌ ప్రక్రియను ప్రారంభించింది. ప్రైవేటు వైద్య కళాశాలల్లో మరో 350 పీజీ సీట్లు పెరగడంతో మొత్తం సీట్ల సంఖ్య 2,229కి చేరింది. డీమ్డ్‌ విశ్వవిద్యాలయాల్లో ఇప్పటికే ఉన్న 300 సీట్లకు అదనంగా మరో 50 సీట్లు పెరిగినట్లు వైద్యవర్గాలు వెల్లడించాయి. ఈ పెంపుతో తెలంగాణలో మొత్తం పీజీ వైద్య సీట్ల సంఖ్య 4,310కి చేరింది.