ఎన్‌సీసీ వ్యవస్థాపకుడు ఏవీఎస్ రాజు మృతి.. చంద్రబాబు సంతాపం

నాగార్జున కన్‌స్ట్రక్షన్ కంపెనీ (ఎన్‌సీసీ) వ్యవస్థాపకుడు, చైర్మన్, పద్మశ్రీ పురస్కార గ్రహీత డాక్టర్ అల్లూరి వెంకట సత్యనారాయణ రాజు మృతిపట్ల ఆంధ్రప్రదేశ్ ముఖ్యమంత్రి చంద్రబాబు నాయుడు తీవ్ర సంతాపం వ్యక్తం చేశారు. డాక్టర్ బీఆర్ అంబేడ్కర్ కోనసీమ జిల్లాలోని అంతర్వేదిపాలెంలో జన్మించిన ఏవీఎస్ రాజు.. ఎన్‌సీసీ సంస్థను స్థాపించి విజయవంతంగా నడిపించారని పేర్కొన్నారు. నిబద్ధత, నిజాయతీతో కూడిన దార్శనిక పారిశ్రామికవేత్తగా దేశ నిర్మాణం, అభివృద్ధికి ఆయన అందించిన సేవలు చిరస్మరణీయమని కొనియాడారు.

పారిశ్రామిక రంగంలోనే కాకుండా సామాజిక సేవలోనూ ఏవీఎస్ రాజు విశేష కృషి చేశారని చంద్రబాబు పేర్కొన్నారు. ఎన్‌సీసీ ఫౌండేషన్ ద్వారా విద్య, వైద్యం, నైపుణ్యాభివృద్ధి రంగాల్లో పేదలకు అండగా నిలిచారని తెలిపారు. పర్యావరణ పరిరక్షణ, గ్రామీణాభివృద్ధి వంటి కార్యక్రమాల ద్వారా సమాజ శ్రేయస్సుకు కృషి చేశారని గుర్తుచేశారు. ఏవీఎస్ రాజు ఆత్మకు శాంతి చేకూరాలని ప్రార్థిస్తూ, ఆయన కుటుంబ సభ్యులకు ముఖ్యమంత్రి ప్రగాఢ సానుభూతి తెలిపారు.