అమరావతిలో చెస్ అకాడమీకి నారా లోకేష్ హామీ.. కోనేరు హంపికి ప్రభుత్వ సహకారం!

ప్రముఖ భారతీయ చదరంగ క్రీడాకారిణి కోనేరు హంపి తన తండ్రి అశోక్‌తో కలిసి శుక్రవారం ఉండవల్లిలోని నివాసంలో ఆంధ్రప్రదేశ్ విద్య, ఐటీ శాఖల మంత్రి నారా లోకేష్‌ను కలిశారు. ఇటీవల జరిగిన చెస్ ఒలింపియాడ్ 2026లో మహిళల విభాగంలో భారత జట్టు కాంస్య పతకం సాధించడంతో పాటు, బోర్డు-1లో ఆడిన కోనేరు హంపి వ్యక్తిగత విభాగంలోనూ కాంస్య పతకం గెలుచుకున్నారు. ఈ విజయాలపై లోకేష్ ఆమెను అభినందించారు.

అమరావతిలో చెస్ అకాడమీ ఏర్పాటు చేసేందుకు ప్రభుత్వం తరఫున సహకారం అందించాలని హంపి మంత్రిని కోరారు. ఆమె విజ్ఞప్తిపై సానుకూలంగా స్పందించిన నారా లోకేష్, అకాడమీ ఏర్పాటుకు అవసరమైన సహాయ సహకారాలు అందిస్తామని భరోసా ఇచ్చారు. ఈ అకాడమీ ద్వారా యువ చదరంగ క్రీడాకారులకు శిక్షణ అవకాశాలు మెరుగుపడటంతో పాటు, రాష్ట్రంలో చెస్ క్రీడ అభివృద్ధికి ప్రోత్సాహం లభించే అవకాశం ఉంది.