మురుసు తుఫాన్ ప్రభావం.. ఏపీ జిల్లాలకు భారీ వర్షాల హెచ్చరికలు

మురుసు తుఫాన్ ప్రభావంతో ఆంధ్రప్రదేశ్‌లోని తీర ప్రాంత జిల్లాల్లో భారీ వర్షాలు కొనసాగుతున్నాయి. తుఫాన్ తీరం దాటే ప్రక్రియ కొనసాగుతున్న నేపథ్యంలో రాష్ట్ర ప్రభుత్వం అధికార యంత్రాంగాన్ని అప్రమత్తం చేసింది. వాతావరణ శాఖ అంచనాల ప్రకారం బాపట్ల, గుంటూరు, కృష్ణా, పల్నాడు, ఎన్టీఆర్, ఏలూరు, పశ్చిమ గోదావరి జిల్లాల్లో భారీ నుంచి అతి భారీ వర్షాలు, అక్కడక్కడ అత్యంత భారీ వర్షాలు కురిసే అవకాశం ఉంది. నవంబర్ 3న కూడా రాష్ట్రంలోని పలు ప్రాంతాల్లో వర్షాలు కురిసే సూచనలు ఉండగా, నవంబర్ 4న మోస్తరు వర్షాలతో పాటు అక్కడక్కడ భారీ వర్షాలు పడే అవకాశం ఉందని అధికారులు తెలిపారు. తుఫాన్ ప్రభావిత ప్రాంతాల ప్రజలు అప్రమత్తంగా ఉండాలని, అధికారుల సూచనలను తప్పనిసరిగా పాటించాలని ప్రభుత్వం విజ్ఞప్తి చేసింది.

ప్రభుత్వం వెల్లడించిన వివరాల ప్రకారం బాపట్ల జిల్లాలో అత్యధికంగా 56.95 మిల్లీమీటర్ల వర్షపాతం నమోదైంది. తుఫాన్ ప్రభావిత ప్రాంతాల్లో సహాయక, పునరావాస చర్యలు కొనసాగుతున్నాయి. ఇప్పటివరకు 10,805 మంది పునరావాస కేంద్రాల్లో ఆశ్రయం పొందుతున్నారు. ప్రాథమిక అంచనాల ప్రకారం 30,661 హెక్టార్ల వరి, 21,474 హెక్టార్ల పత్తి, 605 హెక్టార్ల మొక్కజొన్న పంటలకు నష్టం వాటిల్లే అవకాశం ఉంది. విద్యుత్ సరఫరాను పునరుద్ధరించేందుకు ప్రత్యేక బృందాలను ఏర్పాటు చేసినట్లు ప్రభుత్వం తెలిపింది. సాగునీటి చెరువులు, రిజర్వాయర్లు, లోతట్టు ప్రాంతాల్లో వరద పరిస్థితులను అధికారులు నిరంతరం పర్యవేక్షిస్తున్నారు. తుఫాన్ తీవ్రత క్రమంగా తగ్గే అవకాశం ఉందని ప్రభుత్వం వెల్లడించింది.